Müsavatçı gənclərin Milli Televiziya və Radio Şurasının (MTRŞ) qarşısında yanvarın 21-də piket keçirmək barədə Bakı Şəhər İcra Hakimiyyətinə göndərdikləri müraciətə dünən cavab verilib
Azərbaycan SERVİSİ/ARAN AGENTLİYİ
Müsavatçı gənclərin Milli Televiziya və Radio Şurasının (MTRŞ) qarşısında yanvarın 21-də piket keçirmək barədə Bakı Şəhər İcra Hakimiyyətinə göndərdikləri müraciətə dünən cavab verilib. BŞİH-in ictimai təşkilatlar və siyasi partiyalarla iş üzrə şöbəsinin müdiri Zaur Ramazanovun imzaladığı məktubda təşkilatçılara piketin keçirilməsinin məqsədəuyğun olmadığı bildirilir. Meriya müsavatçılara məsləhət verməyi də unutmur: “Məktubda qaldırdığınız məsələ ilə bağlı mövqeyinizi aksiya keçirməklə deyil, sivil qaydada kütləvi informasiya vasitələrində bildirməniz daha faydalı olardı”.
Piketin təşkilatçılarından olan Müsavat Gənclər Təşkilatının sədri Tural Abbaslı isə meriyanın cavabının və məsləhətinin məntiqsiz olduğunu bildirir: “Piketin keçirilib-keçirilməməsi səlahiyyəti icra hakimiyyətinə yox, təşkilatçılara məxsusdur. İcra hakimiyyətinin üzərinə düşən aksiyaya şərait yaratmaqdır. Lakin Bakı Şəhər İcra Hakimiyyəti faktiki olaraq bu məsələdə səlahiyyətini aşır. İkincisi, deyəsən, BŞİH rəhbərliyi piket və mitinqlərin dünyada qəbul olunmuş sivil mübarizə üsulları olduğunu unudur. Əgər bunu bilmirlərsə, bundan sonra bilsələr yaxşı olar”.
T.Abbaslı yanvarın 21-də, saat 12-yə təyin etdikləri piketi keçirəcəklərini vurğuladı: “Biz qanunun verdiyi hüququmuzdan istifadə edəcəyik”.
Xatırladaq ki, müsavatçılar türk dilində verilişlərin dublyaj edilməsi və türk dilinin xarici dil hesab olunması ilə bağlı MTRŞ-nin qərarına etiraz edirlər.