Tarix : 2009 Jan 24
Kod 10110

ƏLİ, MUHƏMMƏD, FATİMƏ, ZƏHRA ADLARI ÖTƏN İL AZƏRBAYCANDA ƏN ÇOX QOYULAN ADLARDAN OLUB

Ötən il doğulan uşaqlara ən çox verilən oğlan adları Əli, Murad, Məhəmməd, Hüseyn və Nihad, qız adları isə Fatimə, Nərmin, Fidan, Zəhra və Nuray olub
Azərbaycan servisi/Aran Agentliyi
Azərbaycan əhalisinin sayı ötən il ərzində 1,2% və ya 100 min nəfər artaraq, 2009-cu ilin əvvəlinə 8,73 mln. nəfərə çatıb.

Dövlət Statistika Komitəsindən verilən məlumata görə, hazırda ölkədə əhalinin sıxlığı 1 kv. km-ə 101 nəfər təşkil edir. Ötən il əhalinin sayının artması son 35 ildə ilk dəfə təbii artımla yanaşı, miqrasiya artımının hesabına baş verib. Əhalinin 51,7%-i şəhər, 48,3%-i isə kənd yerlərində yaşayır.

Ölkə əhalisinin 49%-ni kişilər, 51%-ni qadınlar təşkil edir və bu gün hər 1 000 nəfər kişiyə 1 027 nəfər qadın düşür.
Əhalinin 23%-i 0-14 yaşda, 70%-i 15-64 yaşda, 7%-i isə 65 və yuxarı yaşda olanlardır. Qeyd edək ki, 14-29 yaşda olan gənclər ölkə əhalisinin 31,2%-ni təşkil edir. Əhalinin orta yaşı 32, doğulanda gözlənilən ömür uzunluğu isə - 72,4 yaş, o cümlədən kişilərdə 69,7, qadınlarda isə 75,1 yaş təşkil edir.

Ötən il ərzində Azərbaycanda 152,1 min, təxminən gündə 417, saatda isə 17 körpə doğulub. Doğulanların 53,9%-i oğlan, 46,1%-i isə qız olub. Körpələrin 1 648-i əkiz, 27-si isə üçəmdir.
Ötən il doğulan uşaqlara ən çox verilən oğlan adları Əli, Murad, Məhəmməd, Hüseyn və Nihad, qız adları isə Fatimə, Nərmin, Fidan, Zəhra və Nuray olub.
 
  • Yazılıb
  • da (də) 2009 Jan 24