Tarix : 2009 Jan 30
Kod 10244

Azərbaycanda Müxalifət MSK sədrini məhkəməyə verir

Müxalifət Mərkəzi Seçki Komissiyasının (MSK) sədri Məzahir Pənahovu məhkəməyə verir. Bu qərar yanvarın 29-da Azərbaycan Demokrat Partiyasının (ADP) qərargahında keçirilən qapalı toplantıda verilib
Azərbaycan servisi/Aran Agentliyi
Müxalifət Mərkəzi Seçki Komissiyasının (MSK) sədri Məzahir Pənahovu məhkəməyə verir. Bu qərar yanvarın 29-da Azərbaycan Demokrat Partiyasının (ADP) qərargahında keçirilən qapalı toplantıda verilib.

ADP sədri Sərdar Cəlaloğlu «Azadlıq» radiosuna bildirib ki, buna səbəb bir müddət əvvəl M.Pənahovun televiziyalarda çıxışında müxalifət partiyalarının ünvanına səsləndirdiyi ittihamlardır.
Onun sözlərinə görə, MSK sədri müxalifətin referendumla bağlı yaratdığı iki təşəbbüs qrupunun qanunları pozması barədə fikirlər səsləndirməklə səlahiyyət həddini aşıb.

S.Cəlaloğlu qeyd edib ki, M.Pənahovun imzatoplama kampaniyasında siyasi mövqe nümayiş etdirməsi onun səlahiyyətlərinə aid deyil. MSK sədri həmin açıqlamasında bir sıra bölgələrdə «Respublikaçılar» və «Qarabağ və Respublika Uğrunda» təşəbbüs qruplarını təmsil edən şəxslərin imza toplamaqdan imtina etdiklərini, imza vərəqələrini hakimiyyət nümayəndələrinə təhvil verdiklərini deyib. Sərdar Cəlaloğlu bildirir ki, bundan başqa, «Qarabağ və Respublika Uğrunda» təşəbbüs qrupuna daxil olan müxalifət partiyaları istəyirlər ki, Konstitusiya Məhkəməsi və Parlament referendumla bağlı qərarlarına yenidən baxsın.

Mərkəzi Seçki Komissiyasının Mətbuat Xidmətinin rəhbəri Azər Sarıyev isə «Azadlıq» radiosuna bildirib ki, qurumun sədri sözügedən məsələ ilə bağlı heç bir siyasi mövqe nümayiş etdirməyib: «Sadəcə, Komissiyaya daxil olan gündəlik məlumatları açıqlayıb». Məhkəməyə gəlincə isə, A.Sarıyev deyib ki, bu, hər bir Azərbaycan vətəndaşının hüququdur.

Konstitusiya Məhkəməsinin hakimi İsa Nəcəfov isə «Azadlıq» radiosuna deyib ki, bu məsələyə yenidən baxılması mümkün deyil: «Çünki referendumla bağlı qərar qəbul ediləndə bu məsələ yüz ölçülüb, bir biçilib. Və bu məsələdə Konstitusiyanın heç bir maddəsi pozulmayıb. Azərbaycanda demokratiyadı, hər kəs öz fikrini bildirə və müraciət edə bilər. Qoy müraciətlərini göndərsinlər».

Bu il martın 18-də Azərbaycanda Konstitusiyaya dəyişiklik və əlavələrlə bağlı referendum keçirilməlidir.
 
  • Yazılıb
  • da (də) 2009 Jan 30