ürkiyə mətbuatı Azərbaycan müdafiə nazirinin keçmiş müavini, general Rail Rzayevin öldürülməsi ilə bağlı müxtəlif versiyalar irəli sürür
Azərbaycan Servisi/Aran Agentliyi
“Yeni Şəfəq” qəzeti yazır ki, Rail Rzayev masonların Azərbaycanda təşkilatlanmasının qarşısını aldığı üçün onların qəzəbinə tuş gəlib.
Türkiyə mətbuatı Azərbaycan müdafiə nazirinin keçmiş müavini, general Rail Rzayevin öldürülməsi ilə bağlı müxtəlif versiyalar irəli sürür.
Lent.az-ın məlumatına görə, Türkiyənin “Yeni Şəfəq” qəzeti generalın masonlar tərəfindən qətlə yetirildiyini iddia edir. Qəzet yazır ki, mərhum general masonların Azərbaycanda təşkilatlanmasının qarşısını alıb. Türkiyə xüsusi xidmət orqanlarının bir qrup əməkdaşı qətlin istintaqı ilə bağlı Bakıya gəlib.
Həmin qrup 17 il müddətində Hərbi Hava Qüvvələri komandanı olmuş Rail Rzayevin qətlində “Ergenekon” izinin olub-olmadığını araşdıracaq: “Qrupun indiyədək əldə etdiyi materiallara əsasən, generalı masonlar ortadan qaldırıb. Belə ki, masonlar 2003-cü ildə Azərbaycanda loja qurmaq üçün ölkə rəhbərliyinə müraciət edib. General Rzayev qəti şəkildə bunun əleyhinə olduğunu bildirib və masonların Azərbaycanda təşkilatlanmasının qarşısını alıb. Bu səbəbdən general aradan götürülüb”.
Qəzetin iddiasına görə, Türkiyədəki Masonlar Lojası 2003-cü il iyunun 14-də Azərbaycanda da loja qurmaq barədə qərar qəbul edib. Bu işi həyata keçirmək üçün “Yeni üfüq” adlı komitə yaradılıb və komitəyə rəhbərlik bir azərbaycanlıya həvalə olunub. Komitənin Azərbaycanda təşkilatlanmaq barədə ölkə rəhbərliyinə müraciətinə müsbət cavab verilməyib. Burada general Rzayevin təsiri böyük olub. Nəticədə general masonların qəzəbinə tuş gəlib.