bu gün Nəsimi rayon Məhkəməsində hakim Səyyad Qafarinin sədrliyi ilə keçirilən prosesdə S. Əlizadəyə hökm oxunub
Azərbaycan servisi/Aran Agentliyi
Politoloq Zərdüşt Əlizadənin oğlu Salur Əlizadə azadlığa buraxılıb.
Bu barədə APA-ya S. Əlizadənin vəkili Elçin Sadıqov məlumat verib. Məlumata görə, bu gün Nəsimi rayon Məhkəməsində hakim Səyyad Qafarinin sədrliyi ilə keçirilən prosesdə S. Əlizadəyə hökm oxunub. Məhkəmənin hökmü ilə S. Əlizadə Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlanma) maddəsi ilə təqsirli bilinərək 1 il müddətinə azadlığın məhdudlaşdırılması cəzasına məhkum edilib.
Təqsirləndirilən şəxsin həbsdə qaldığı bir gün ona verilən cəzanın üç gününə hesablanaraq, 5 ay müddətinə azadlığın məhdudlaşdırılması cəzasına məhkum edilib. Məhkəmə, həmçinin S. Əlizadənin məcburi müalicə olunması barədə də qərar çıxarıb və o, məhkəmə zalından azadlığa buraxılıb.
Qeyd edək ki, S. Əlizadə yanvarın 21-də Daxili İşlər Nazirliyi Baş Narkotiklərlə Mübarizə İdarəsi əməkdaşlarının keçirdikləri əməliyyat nəticəsində həbs edilib. 1979-cu il təvəllüdlü S. Əlizadə Cinayət Məcəlləsinin 234.1 maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından arıq miqdarda əldə etmə və saxlanma) ittiham olunub.