Azərbaycan Respublikası Milli Məclisi İnzibati Xətalar Məcəlləsinə dəyişikliklər edib. Dəyişikliyə görə dini qanunvericiliyin tələblərini pozanlara qarşı cərimələr artırılıb
Azərbaycan servisi/Aran acentliyi
“Aran” İnformasiya Agentliyinin Bakıdan verdiyi məlumata görə, Azərbaycan Respublikası Milli Məclisi İnzibati Xətalar Məcəlləsinə dəyişikliklər edib. Dəyişikliyə görə dini qanunvericiliyin tələblərini pozanlara qarşı cərimələr artırılıb.
Məcəllənin 299-cu (dini qurumların yaradılması və fəaliyyət qaydasının pozulması) və 300-cü (qanunsuz dini ədəbiyyatların təbliği) maddələrinə dəyişikliklərlə bağlı hazırlanan layihə qəbul edilib.
Bundan sonra dini qurumların yaradılması və fəaliyyət qaydasının pozulması maddələrini pozan fiziki şəxslərdən tutulan 100 manatdan 300 manatadək cərimə 1500 manatdan 2000 manatadək, vəzifəli şəxslərdən tutulan 200 manatdan 500 manatadək cərimə isə 7000 manatdan 8000 manatadək artırılır.
Qanunsuz dini ədəbiyyat, əşya və nümunələr müsadirə edilməklə vətəndaşlar 2000 manatdan 2500 manatadək, vəzifəli şəxslər 8000 manatdan 9000 manatadək, hüquqi şəxslər 20000 manatdan 25000 manatadək cərimə edilir. Əcnəbi və vətəndaşlığı olmayan şəxslər isə 2000 manatdan 2500 manatadək cərimə edilməklə Azərbaycan ərazisindən inzibati qaydada çıxarılır.
Müzakirə zamanı deputatlar Aqil Abbas, Zahid Oruc, Siyavuş Novruzov dini ədəbiyyatın ölkəyə qeyri-qanuni gətirilməsinə toxunaraq bu sahədə cəzaların sərtləşdirilməsini təklif ediblər.
“Aran” İA