Orta məktəblərdə hicab probleminin həlli üçün dövlət başçısına müraciətlə 100 min imzanın toplanması üzrə kampaniya davam edir
well/Aran agentliyi
Orta məktəblərdə hicab probleminin həlli üçün dövlət başçısına müraciətlə 100 min imzanın toplanması üzrə kampaniya davam edir. Artıq kampaniyanın Niməyi-Şəbana (15 Şəban tarixinə - red.) qədərki birinci mərhələsi arxada qalmışdır. İlk mərhələdə 30 min imzanın toplanılması nəzərdə tutulsa da, 70 mindən yuxarı imza yığılmışdır.
Yüzminlik imzatoplama kampaniyasının ilk mərhələsini dəyərləndirərkən Nardaran ağsaqqalı Hacı Natiq Kərimov fikirlərini "Deyerler.org"a belə bölüşmüşdür: “Bismilləhir-Rahmənir-Rahim! Kampaniyanın Niməyi-Şəbana qədər olan birinci mərhələsini müsbət qiymətləndirirəm. Nəticəsindən də bəllidir ki, işlər çox böyük ruh yüksəkliyi ilə görülüb. Bu vaxta kimi gedən prosesdən aydın olur ki, insanlar öz imzaları ilə bildirirlər ki, onlar hicabın məktəblərdə qadağa olunmasının əleyhinədirlər. İnşaallah, ümid edirəm ki, imzaların sayı sentyabr ayına kimi yüz mini dəfələrlə ötüb keçəcək. Bu kampaniyanın da birinci mərhələsinin belə uğurlu keçməsinə görə bütün müsəlmanları, İslamsevərləri və hicabsevərləri təbrik edirəm”.