Azərbaycanın BMT Təhlükəsizlik Şurasının qeyri-daimi üzvü seçilməsini məmnuniyyətlə qarşılayırıq
/Aran agentliyi
Azərbaycanın BMT Təhlükəsizlik Şurasının qeyri-daimi üzvü seçilməsini məmnuniyyətlə qarşılayırıq
Tərəflər Dağlıq Qarabağ münaqişəsinin suverenlik, ərazi bütövlüyü və beynəlxalq hüquq normaları çərçivəsində həllinin vacibliyini vurğulayıb
Azərbaycan, Türkiyə və İranın xarici işlər nazirlərinin Naxçıvanda keçirilən görüşü başa çatıb. Simsar.az-ın Naxçıvana ezamolunmuş xüsusi müxbirinin məlumatına görə, regional əlaqələrin və layihələrin müzakirə olunduğu görüşün yekununda Naxçıvan Bəyannaməsi imzalanıb.
Bəyannamədə qeyd olunub ki, nazirlər önəmli regional və beynəlxalq məsələlərdə müzakirələri davam etdirməyi dəstəkləyirlər: «Azərbaycanın BMT Təhlükəsizlik Şurasının qeyri-daimi üzvü seçilməsini məmnuniyyətlə qarşılayırıq».
Sənəddə qeyd olunub ki, tərəflər Dağlıq Qarabağ münaqişəsinin suverenlik, ərazi bütövlüyü və beynəlxalq hüquq normaları çərçivəsində həllinin vacibliyi vurğulayır.
Sənəddə bildirilir ki, nazirlər üçtərəfli iqtisadi komitənin bu ilin may ayında Türkiyədə ticarət, sənaye və investisiya, iyunda Azərbaycanda nəqliyyat, sentyabrda İranda enerji, oktyabrda İranda Turizm və mədəniyyət alt komitələrinin toplantılarının keçirilməsini razılaşdırıblar. Toplantıların dəqiq tarixi görüşdən bir ay əvvəl müəyyənləşdiriləcək.
Tərəflər Bakı-Tiflis-Qars dəmir yolunun Naxçıvan-Culfa-Təbriz dəmir yoluna birləşdirmə imkanlarının mövcud olduğunu bəyan ediblər.
Tərəflər viza rejiminin sadələşdirilməsi məsələsini düşünəcəklər.
Nazirlərin növbəti görüşü 2012-ci ilin sentyabr ayında Van şəhərində keçiriləcək.
Sənədi Azərbaycanın xarici işlər naziri Elmar Məmmədyarov, Türkiyənin xarici işlər naziri Əhməd Davudoğlu və İranın xarici işlər naziri Əli Əkbər Salehi imzalayıblar.