Məhkəmə prosesində hakim “cinayət işinin” tərkibi, işin araşdırılması üçün yenidən baxış keçirilməsinin zəruri olduğunu deyib
/Aran agentliyi
Məhkəmə prosesində hakim “cinayət işinin” tərkibi, işin araşdırılması üçün yenidən baxış keçirilməsinin zəruri olduğunu deyib.
Azərbaycan İslam partiyasının üzvləri və digər ruhanilərin apellyasiya məhkəməsi keçirilib. Hakim Həsən Əhmədovun sədrliyi ilə keçirilən məhkəmə prosesində tanışlıq iclası keçirilib. Məhkəmə prosesində hakim “cinayət işinin” tərkibi, işin araşdırılması üçün yenidən baxış keçirilməsinin zəruri olduğunu deyib. Bundan başqa məhkəmə heyəti və dövlət ittihamçısı təqdim olunub. AİP üzvləri və ruhanilərin vəkili Anar Qasımlının İslamazeri.az-a verdiyi məlumata görə, növbəti məhkəmə prosesi may ayının 10-na təyin edilib.
Xatırladaq ki, 2011-ci il oktyabrın 7-də Bakı Ağır Cinayətlər Məhkəməsi Azərbaycan İslam Partiyasının lideri Mövsüm Səmədovun 12 il, partiyanın Astara rayon təşkilatının sədri Rufulla Axundzadənin 11 il 6 ay, partiyanın sədr müavini Vaqif Abdullayevin 11 il, Masallı ruhanisi Fəramiz Abbasovun 11 il, Mövsüm Səmədovun qayını Firdovsi Məmmədrzayev, əmisi oğlu Dəyanət Səmədovun isə hər birinin 10 il müddətinə həbs verilməsinə dair hökm çıxarıb.
İlahiyyatçı alim Zülfüqar Mikayılzadə 5 il sınaq müddəti tətbiq olunmaqla 11 il şərti həbs cəzasına məhkum olunub.
Onlar Cinayət Məcəlləsinin 214.2.1 (Qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən cinayətə hazırlıq); 214.2.3 (Odlu silahdan və silah qismində istifadə olunan predmetlərdən istifadə etməklə cinayətə hazırlıq); 228.3 (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə); 278-ci (Hakimiyyəti zorla ələ keçirmə və ya onu zorla saxlama) maddələri ilə təqsirli biliniblər.
Rufulla Axundzadə Cinayət Məcəlləsinin 283.1-ci (Milli, irqi, sosial və ya dini nifrət və düşmənçiliyin salınmasına, milli ləyaqətin alçaldılmasına, habelə milli, irqi və ya dini mənsubiyyətindən asılı olaraq vətəndaşların hüquqlarının məhdudlaşdırılmasına və ya üstünlüklərinin müəyyən edilməsinə yönələn hərəkətlər, aşkar surətdə və ya kütləvi informasiya vasitələrindən istifadə olunmaqla törədildikdə) maddəsi ilə də təqsirli bilinib.
Məhkum olunmuş islamçılar Bakı Ağır Cinayətlər Məhkəməsinin hökmündən apellyasiya şikayəti veriblər.
Xeber7.com