Quba xalqının etirazına səbəb olmuş Quba rayon icra hakimiyyəti başçısı Rauf Həbibovun çıxışının videosunu sosial şəbəkələrdə yayan və həmin çıxışa dini məzmunlu ...
/Aran Agentliyi
Quba xalqının etirazına səbəb olmuş Quba rayon icra hakimiyyəti başçısı Rauf Həbibovun çıxışının videosunu sosial şəbəkələrdə yayan və həmin çıxışa dini məzmunlu şərh yazan vətəndaş həbs olunub.
Videoya şərhdə “gözə-göz, dişə-diş” yəni ziyana-ziyan yazılmışdır.
Bu barədə vəkil Elçin Sadıqov "Turan"a bildirib.
Vəkilin dediyinə görə istintaq orqanı indiyədək həmin şəxslərlə bağlı müdafiə tərəfinə məlumat verməyib.
Vəkilin fikrincə, bu şəxslərin həbsi “Xəyal” televiziyasının icraçı direktoru Vüqar Qonaqovun və baş redaktor Zaur Quliyevin həbsdən azad edilmə ehtimalını çoxalda bilər. Çünki Azərbaycan Respublikası hökuməti bu jurnalistləri Rauf Həbibovun çıxışını yaymaqda, kütləvi iğtişaşları təşkil etməkdə günahlandırır. İndi görünür ki, jurnalistlər videonu yaymayıb.
E.Sadıqovun sözlərinə görə, martın sonlarından indiyədək Xəyal TV-nin jurnalistləri ilə bağlı hər hansı istintaq hərəkəri aparılmayıb. “Onlar sadəcə istintaq təcridxanasında saxlanılır”, - deyə vəkil bildirib.
Qeyd etmək lazımdir ki, Martın 1-də Quba rayonunda (Bakıdan 170 kilometr şimalda) xalq aksiyası yaranıb. Qubada etiraza icra hakimiyyəti başçısının yerli əhalini təhqir edən çıxışının youtube saytına yerləşdirilməsi səbəb olub. Ümumi kontekstdə sosial vəziyyətlərindən, məmur davranışından narazı insanlar etiraz aksiyası keçirib. Dinc aksiya sonradan hökumətin xüsusiylə Daxili İşlər Nazirliyi tərəfindən Bakıdan Qubaya göndərilmiş Daxili Qoşunlar və Çevik Polis Alayının zorakılığı nəticəsində qarşıdurma xarakteri alıb. Polis gözyaşardıcı qazdan istifadə edib, cəmiyyətə atəş açıb. Əhali isə icra başçısının evini, yardımçı tikililərini yandırıb. Daxili qoşun hissələri ilə qarşıdurma olub. Etirazçılar polis qüvvələrinə daş, asfalt parçaları və kəsəklərlə hücum çəkib. Sonra İcra başçısının vəzifədən azad dilməsi insanların evlərinə dağılmasına səbəb olub.