Azərbaycan İslam Partiyasının həbsdə olan lideri Mövsüm Səmədov müxalif və müstəqil qəzetləri izləyə bilmir. O, vəkil Anar Qasımlıya bu barədə gileylənib
m/Aran Agentliyi
Sentyabrın 26-da Anar Qasımlı 11 saylı Cəzaçəkmə Müəssisəsində məhbus partiya lideri ilə görüşüb. “Media forum” saytına danışan vəkilin sözlərinə görə, Mövsüm Səmədov cəzaçəkmə müəssisəsinə köçürüləndən məlumatsız qaldığını, Azərbaycanda və dünyada baş verənləri izləyə bilmədiyini deyib: “Ona yalnız rəsmi qəzetlər verilir. Bu isə Mövsüm bəyi alternativ informasiya almaq imkanından məhrum edir”.
Mövsüm Səmədov 11 saylı Cəzaçəkmə Müəssisəsinə bu ilin mayında köçürülüb.
Anar Qasımlı hüquqlarını müdafiə etdiyi şəxsin müxalif və müstəqil mətbuatla təmin olunması üçün Penitensiar Xidmətin rəhbərliyinə rəsmi müraciət edəcəyini vurğulayıb.
2011-ci il oktyabrın 7-də Bakı Ağır Cinayətlər Məhkəməsi Mövsüm Səmədova 12 il iş kəsib. Bu il mayın 17-də Bakı Apellyasiya Məhkəməsi qərarı qüvvədə saxlayıb. Partiya lideri hakimiyyəti zorla ələ keçirmə və başqa cinayətlərdə təqsirli bilinib.(deyerler)