/Aran Agentliyi
ATƏT PA payız sessiyasında Ermənistan nümayəndələrinin tənqidləri ilə üzləşən Azərbaycanın ATƏT Parlament Assambleyasındakı nümayəndə heyətinin üzvü bildirib : “Azərbaycan hökuməti Ramil Səfərovu heç vaxt qəhrəman hesab etməyib”
Oktyabrın 6-da Albaniyanın Tirana şəhərində ATƏT PA payız sessiyasının ikinci günü deputat Azay Quliyev Ermənistanı yalan danışmaqda ittiham edərək deyib : “Ramil Səfərovun ekstradisiyası və onun Azərbaycan prezidenti tərəfindən əfv edilməsi hüquqi nöqteyi-nəzərdən qüsursuz olaraq həyata keçirilib. Azərbaycan hökuməti Ramil Səfərovu heç vaxt qəhrəman hesab etməyib. Onun hərəkətləri rəsmi səviyyədə heç vaxt bəyənilməyib və haqq qazandırılmayıb!”
Azərbaycan Respublikası Parlamentinin deputatı əlavə edib : “Mən Ermənistan rəsmilərinin Ramil Səfərov məsələsindən bəhanə kimi istifadə edərək, öz varlıqlarını Azərbaycanın işğal olunmuş ərazilərində leqallaşdırmamağa və beynəlxalq aləmi çaşdırmamağa çağırıram. Ramil Səfərov məsələsi bitmişdir və bundan sonra müzakirə olunmamalıdır”.
Qeyd etmək lazımdır ki, bir qədər əvvəl isə Azərbaycan Respublikası prezidenti İlham Əliyevin Fransa səfəri zamanı Lomond qəzeti məlumat vermişdi ki, İlham Əliyev Fransa prezidenti ilə görüşündə zabit Ramil Səfərovu əfv etdiyindən peşman olduğunu bildirib.
Prezident İlham Əliyev Lomond qəzetinin bu məlumatı qarşısında heç bir açıqlama verməyib.