Qarabağ veteranı, məcburi köçkün Nizami Əliyevə məxsus torpaq sahəsi Qəbələ Rayon İcra Hakimiyyəti tərəfindən zəbt edilib. Bu barədə “Azadlıq”a Nizami Əliyev özü bildirib
/Aran Agentliyi
İslaminsesi.az - Qarabağ veteranı, məcburi köçkün Nizami Əliyevə məxsus torpaq sahəsi Qəbələ Rayon İcra Hakimiyyəti tərəfindən zəbt edilib. Bu barədə “Azadlıq”a Nizami Əliyev özü bildirib. Onun sözlərinə görə, həmin torpaq sahəsini 2005-ci ildə qonşusunun adına alıb. 2011-ci ildə isə torpaq sahəsini öz adına keçirməklə yeni şəhadətnamə alıb: “Sahibkarlıq fəaliyyəti üçün aldığım 300 kvadratmetrlik həmin torpaq sahəsinə reyester idarəsi 2 dəfə şəhadətnə verib. Beləliklə də həmin torpaq sahəsi mənim xüsusi mülkiyyətimdir”.
Lakin Qəbələ Rayon İcra Hakimiyyəti Nizami Əliyevin xüsusi mülkiyyətində olan torpaq sahəsində ondan xəbərsiz park salıb. Qarabağ veteranı bundan xəbər tutduqda icra hakimiyyətinə müraciət edib. İcra hakimiyyətindən Nizami Əliyevin müraciətinə cavabda da torpaq sahəsinin onun mülkiyyəti etiraf edilib. Həmçinin qeyd edilib ki, ərazidə park salınmasını nəzərə alsın. Bu absurd cavabdan sonra Nizami Əliyev yuxarı qurumlara müraciət edib. Eyni zamanda Qəbələnin icra başçısı Səbuhi Abdullayevin qəbulunda olub. Lakin icra başçısı Qarabağ veteranının dinləmək əvəzinə onu hədələyib: “Səbuhi müəllimin yanında olarkən istədim sənədlərimin qanuni olması barədə fikrimi deyim. O isə məni eşitmək əvəzinə hədələməyə, şantaj etməyə başladı. Mənə dedi ki, sən kimsən, Luna Parkın yanında özünə ev tikdirmisən? Sənin evini yoxlatdıracam görüm nə ilə tikdirmisən”.
Nizami Əliyev deyib ki, bu məsələ ilə bağlı ölkə başçısı İlham Əliyevə və müvafiq instansiyalara müraciət edib. Lakin hələ ki, nəticə yoxdur: “Ötür-ötür oyunu oynayırlar. Mən Qəbələ Rayon İcra Hakimiyyətindən şikayət edirəm. Onlar da şikayəti baxılması üçün bu quruma göndərirlər. Təsəvvür edin, məndə olan məlumata görə həmin torpaq sahəsilə müəyyən maliyyə əməliyyatları aparılıb və icra hakimiyyətinin maraqları təmin edilib. Bununla bağlı Baş Prokurorluq yanında Korrupsiyaya Qarşı Mübarizə Idarəsinə müraciət etmişəm. Lakin müraciət araşdırılması üçün Qəbələ prokurorluğuna göndərilib. Məgər mən Qəbələ prokurorluğunun ünvanını bilmirəm? Lazım olsaydı elə ora müraciət edərdim də. Hesab edirəm ki, bu məqsədyönlü şəkildə belə edilir. Səbuhi Abdullayevin qanunsuz əməllərini ört-basdır etmək istəyirlər. Ona görə də mən bəribaşdan Qəbələ prokurorluğunun araşdırmasını nəticəsindən asılı olmayaraq qəbul etməyəcəm”.
Nizami Əliyev sonda qeyd edib ki, mülkiyyətində olan torpaq sahəsini və yaxud əvəzində kompensasiya almaq üçün mübarizəsini davam etdirəcək.