Rusiya prezidenti Vladimir Putin "Rusiya Federasiyasının Hərbi Doktrinası" haqqında yeni fərman imzalayıb.
AranNews- Bu sənəd Rusiyanın hazırda qüvvədə olan, 2013-cü il iyulun 5-də Rusiya Təhlükəsizlik Şurası tərəfindən qəbul olunmuş Hərbi Doktrinasına yeni redaktələri ehtiva edir.
Qeyd olunur ki, doktrinaya edilmiş dəyişikliklər Təhlükəsizlik Şurasının dekabrın 19-da keçirilən iclasında təsdiqlənib.
Təhlükəsizlik Şurasının rəsmi saytında bildirilir ki, dəyişikliklər ilk növbədə Rusiya üçün yeni - xüsusilə də Ukraynadakı vəziyyətlə, həmçinin Afrikanın şimalında, Suriya, İraq və Əfqanıstanda təhdidlərin yaranması ilə bağlıdır. Bundan başqa, açıqlamada qeyd olunur ki, "Rusiya sərhədlərində NATO-nun potensialı güclənir, raket hücumundan müdafiə sisteminin qlobal yerləşdirilməsi istiqamətində fəal işlər həyata keçirilir".
Bununla belə, vurğulanır ki, yeni doktrina özünün müdafiə xarakterli məzmununu qoruyur və hərbi gücdən istifadəni ancaq bütün dinc vasitələrin sıradan çıxmasından sonra məqbul sayır.
Bu amil Rusiyanın yaxın qonşusu olan Azərbaycan üçün də öz Hərbi Doktrinasına müəyyən redaktələr etməyə zəmin yarada bilərmi?
Hərbi ekspert Üzeyir Cəfərov "Bakı-Xəbər"ə açıqlamasında bildirdi ki, Rusiya-Ukrayna münasibətləri fonunda baş verən hadisələr Rusiya prezidenti Vladimir Putini təcili addımlar atmağa və qərarlar qəbul etməyə vadar edir: "Bunlardan biri də "Rusiya Federasiyasının Hərbi Doktrinası" haqqında yeni fərman imzalanmasıdır ki, indi bunu çoxları maraqla izləyir. Bildiyiniz kimi, bu, ötən il qəbul edilmiş bir yeni sənədə əlavədir ki, bu da Rusiya kimi nüvə dövləti üçün çox nadir hallarda müşahidə olunan hadisədir. Yəni Hərbi Doktrina və ya Milli Təhlükəsizlik Konsepsiyası adətən uzun müddətə hazırlanır və çox nadir hallarda, fors-major hallarda onlara dəyişiklik və ya əlavələr edilir. İndi təsəvvür edin, vəziyyət hansı kritik nöqtəyə çatıb ki, Rusiyanın hazırda qüvvədə olan, 2013-cü il iyulun 5-də Rusiya Təhlükəsizlik Şurası tərəfindən qəbul olunmuş Hərbi Doktrinasına yeni redaktələr edilir. Artıq doktrinaya edilmiş dəyişikliklər Təhlükəsizlik Şurasının dekabrın 19-da keçirilən iclasında təsdiqlənib. Bu dəyişikliklər ilk növbədə Rusiya üçün yeni - xüsusilə də Ukraynadakı vəziyyətlə, həmçinin Afrikanın şimalında, Suriya, İraq və Əfqanıstanda təhdidlərin yaranması ilə bağlıdır. Bundan başqa, açıqlamada qeyd olunur ki, "Rusiya sərhədlərində NATO-nun potensialı güclənir, raket hücumundan müdafiə sisteminin qlobal yerləşdirilməsi istiqamətində fəal işlər həyata keçirilir".
Yeni dəyişikliklə əlaqədar Rusiya rəsmiləri özlərini sığortalamaq üçün qeyd ediblər ki, yeni doktrina özünün müdafiə xarakterini əvvəlki kimi saxlayır və hərbi gücdən istifadə ancaq bütün dinc vasitələrin sıradan çıxmasından sonra məqbul sayılacaq.
Bizim region dövlətləri də Rusiya Federasiyasının Hərbi Doktrinasına edilmiş dəyişiklikləri nəzərə almalıdır. Azərbaycana bu yeni müddəalardan hansısa təhlükə olmasa da, hər halda, biz prosesləri diqqətdə saxlamalıyıq".