Tarix : 2016 Mar 15
Kod 48197

İlham Əliyevin Türkiyəyə səfərinin proqramı AÇIQLANDI

Ərdoğanın Azərbaycan səfəri yenə təxirə salındı, Əliyev Ankaraya gedir.
AranNews- Azərbaycan Prezidenti İlham Əliyevin Türkiyə Prezidenti Rəcəb Tayyib Ərdoğanla görüşü və səfər proqramı açıqlanıb.
Türkiyə prezidentinin saytında bildirilir ki, yerli vaxtla 10.30-da Azərbaycan prezidentinin rəsmi qarşılanma mərasimi olacaq. Daha sonra 10.45-də prezidentlərin təkbətək görüş keçirəcək.
Bunun ardınca Türkiyə-Azərbaycan Yüksək Səviyyəli Strateji Əməkdaşlıq Şurasının V iclası başlayacaq.
Bu toplantıdan sonra tərəflər arasında sənədlərin imzalanma mərasimi və dövlət başçılarının birgə mətbuat konfransı keçiriləcək. Tədbirlərin hamısı Türkiyə Prezidentliyi Kompleksində (Cumhurbaşkanlığı Külliyesi) olacaq.
Qeyd edək ki, Rəcəb Tayyib Ərdoğan bu il martın 15-də Türkiyə-Azərbaycan Yüksək Səviyyəli Strateji Əməkdaşlıq Şurasının V iclasında iştirak etmək üçün Azərbaycana gəlməli idi. Ancaq martın 13-də Türkiyənin paytaxtı Ankarada törədilən terrora görə, o səfərini təxirə salıb. Azərbaycan Prezidenti Türkiyənin paytaxtı Ankara şəhərində baş vermiş terror aktından sonra bu ölkəylə həmrəylik nümayiş etdirərək, Azərbaycan-Türkiyə Yüksək Səviyyəli Strateji Əməkdaşlıq Şurasının V toplantısının Bakıda deyil, Ankarada keçirilməsini təklif edib.
Türkiyə Prezidenti Rəcəb Tayyib Ərdoğan terrorla mübarizə məsələsində Türkiyəylə həmrəylik nümayişinə və bu jestinə görə Azərbaycan Prezidenti İlham Əliyevə təşəkkür edib. Ankarada baş verən terror aktı nəticəsində 37 nəfər həlak olub, 125 nəfər isə yaralanıb.
  • Yazılıb
  • da (də) 2016 Mar 15
  • Göndərən مدير سايت Aran News