Arannews- Rusiyanın Təhsil Nazirliyi hicab qadağasının yolverilməz olduğu barədə qərar qəbul edib.Rusiyanın Təhsil və Elm Nazirliyi zahiri əlamətlərinə görə tələbələrin ali məktəblərə çıxışını məhdudlaşdırmağı yolverilməz adlandırıb.
Bu barədə nazirliyin mətbuat xidmətindən hicablı abituriyentlə bağlı vəziyyəti şərh edərkən bildirilib.
"Ali təhsil üzrə təhsil təşkilatlarına bu səbəblərə görə istənilən imkan məhdudlaşdırılması yolverilməzdir. Tələbələrin xarici görünüşü üzrə tələblər ali məktəbin daxili nizam-intizam qaydaları ilə müəyyən edilməlidir, ali məktəbin administrasiyası isə bu tələblərin yerinə yetirilməsinə nəzarət etməlidir. Rusiyada təhsil hüququ cinsindən, irqindən, milliyyətindən, dilindən, mənşəyindən, əmlak, sosial və vəzifə vəziyyətindən, yaşayış yerindən, dinə münasibətindən, əqidəsindən, ictimai birliklərə mənsubiyyətindən və digər hallardan asılı olmayaraq zəmanət edilir." - deyə, nazirliyin mətbuat xidmətindən verilən açıqlamada deyilir.
Qeyd edək ki, bir müddət öncə KİV-də Moskva Dövlət Beynəlxalq Münasibətlər İnstitutunun mühafizəsinin hicablı abituriyenti buraxmaqdan imtina etməsi məlumatları yayılmışdı. MDBMİ - Rusiyanın Xarici İşlər Nazirliyinin ali müəssisəsidir.