Əks təqdirdə, mitinqin təşkilatçıları və günahkarlar qanun çərçivəsində cəzalandırılacaqlar.
Arannews- Azərbaycan Respublikası Daxili İşlər Nazirliyinin Baş Polis İdarəsi siyasi qruplar və partiyalara konstitusiyaya dəyişikliklə əlaqədar referendumun keçirilməsi əleyhinə aksiyanın keçirilməsində istənilən pozuntu halı barədə xəbərdarlıq edib.
İdarənin rəis müavini, polis general-mayoru Səhlab Bağırov APA-ya açıqlamasında bildirib ki, Milli Şuranın Bakı şəhər İcra Hakimiyyəti ilə razılaşdırılmış mitinqində hər-hansı təxribata imkan verilməyəcək: “Biz mitinqin təşkilatçılarını Bakı şəhər Baş Polis İdarəsinə dəvət etmişik. Onlara xəbərdarlıq ediləcək. Mitinqdə aksiyanın keçirilməsi üçün Bakı şəhər İcra Hakimiyyətinə ünvanlanan müraciətdə qeyd olunan şüarlardan başqa şüarların səslənməsinə, həmçinin iğtişaşa və qarşıdurmaya səbəb ola biləcək hər hansı addımın atılmasına imkan verilməyəcək. Əks təqdirdə, mitinqin təşkilatçıları və günahkarlar qanun çərçivəsində cəzalandırılacaqlar".
S. Bağırov onu da qeyd edib ki, mitinqin təşkilatçılarına vaxtın dəyişdirilməsi təklif olunacaq: "Onlar Bakı şəhər İcra Hakimiyyətinə ünvanladıqları müraciətdə mitinqin saat 17.00-dan 19.00-dək keçirilməsini istəyiblər. Hava tez qaraldığı üçün onlara təklif edəcəyik ki, mitinqin vaxtını bir-iki saat irəli çəksinlər".
Qeyd edək ki, Milli Şurası sentyabrın 11-də mitinq keçirmək üçün Bakı Şəhər İcra Hakimiyyətinə müraciət ünvanlayıb.
Mitinqin sentyabrın 11-də Yasamal İdman Sağlamlıq Kompleksinin stadionunda (keçmiş “Məhsul” stadionu) keçirilməsinə razılıq verilib.