Tarix : 2017 Jan 01
Kod 51027

Elçin Qasımov: "Gec-tez, hər bir məmləkətdə haqq-ədalət bərpa olunacaq"

Müsəlman Birliyi Hərəkatı sədrinin müavini: "Bizdən zərrə qədər narahat olmayın. Azərbaycan xalqına, ac-yalavac insanlara, dəyərlərin itməsinə görə narahat olun. Biz öz günahsızlığımızı sübut edəcəyik".
Arannews- “Gec-tez, hər bir məmləkətdə haqq-ədalət bərpa olunacaq. Burada haqqı müdafiə edənlərin məhkəməsi gedir. Bizdən zərrə qədər narahat olmayın. Azərbaycan xalqına, ac-yalavac insanlara, dəyərlərin itməsinə görə narahat olun. Şükür Allaha, biz yaxşıyıq. Biz öz günahsızlığımızı sübut edəcəyik, siz də buna şahid olacaqsınız”.
Bu sözləri Müsəlman Birliyi Hərəkatı sədrinin müavini Elçin Qasımov dilə gətirib. O, özünün, eləcə də mühakimə olunan daha 11 nəfərin (Nahid Qəhrəmanov, Ağaəli Yəhyayev, Seyfəddin Şirvanov, Fərhad Muradov, Ramil Əliyev, Elgün Axundov, Vüsal Alış, İsa İbrahimov, Seymur Aslanov, Əli Şahbazov və Əmirəli Əliyev) məhkəməsində danışıb. Adları çəkilən şəxslər Nardaran hadisələrindən sonra həbs olunan dindarlardır və onların işinə Bakı Ağır Cinayətlər Məhkəməsində baxılır.
Dekabrın 30-da məhkəmənin hazırlıq iclasında Elçin Qasımov və Seyfəddin Şirvanovun vəkili Fariz Namazlı müdafiə etdiyi şəxslər haqqında cinayət işinə xitam verilməsindən ötrü vəsatət qaldırıblar. İşin məhkəmə baxışına çıxarılmasına etirazını bildirən vəkillər bu adamların əməlində cinayət tərkibi görmədiklərini vurğulayıblar: “İstintaq orqanı onları cinayətkar dəstə kimi qələmə verib, ancaq bu, düzgün deyil. Müsəlman Birliyi Hərəkatı qeyri-hökumət təşkilatıdır. Birliyin qeydiyyata alınması üçün təsis sənədləri iki dəfə Ədliyyə Nazirliyinə də təqdim olunub. Ancaq nazirlik əsassız cavabla birliyi dövlət qeydiyyatına almaqdan imtina edib”.
Vəkil Fariz Namazlı daha bir vəsatətində müdafiə etdiyi şəxslərin ev dustaqlığına buraxılmasını istəyib.

Fariz Namazlı eyni zamanda, hüquqlarını müdafiə etdiyi şəxslərin məhkəmə salonundakı şüşə kabinədən çıxarılıb, vəkillərinin yanında əyləşməsinə icazə verilməsini istəyib. Vəkil bunu müdafiənin qurulması, zəruri məsləhətləşmələrə ehtiyac baxımından əsaslandırıb.

Hakim Mayıl Bayramov bu vəsatətə özünəməxsus reaksiya verib: “Olmaz ki, siz gedib içəridə təqsirləndirilən şəxslərin yanında oturasınız?!”.
Fariz Namazlının daha bir vəsatətində əlavə şahidlərin, o cümlədən Taleh Bağırovla hal şahidlərinin bu məhkəmədə dindirilməsi istənib.
Daxili İşlər Nazirliyinin (DİN-nin) təqsirləndirilən şəxslərin təqsirsizlik prezumpsiyası hüququnu da pozduğunu vurğulayan vəkil bu barədə ayrıca qərar çıxarılmasını vacib sayıb: “Dekabrın 15-də DİN-in mətbuat katibi bəyanat yayaraq, Müsəlman Birliyi Hərəkatını “cinayətkar dəstə” adlandırıb. Yazılıb ki, onlar ağır cinayət törədiblər və cəzalarını alacaqlar. Hökm olmadan belə fikir səsləndirmək təqsirsizlik prezumpsiyası hüququnun pozuntusudur və bu pozuntunun tanınmasını istəyirik. Xahiş edirik, Sadiq Gözəlov barəsində də xüsusi qərar çıxarılsın”.

Təqsirləndirilən Elgün Axundovun vəkili Gürsel Atakişiyev istintaqda yol verilmiş qanun pozuntularından danışıb.

İsa İbrahimovun vəkili Azər Nağıyev müvəkkilinin Nardaran hadisələri zamanı, ümumiyyətlə, Azərbaycanda olmadığına diqqət çəkib.

“Biz insanların bərabər yaşamasını, Konstitusiyanın işləməsini istəyirik”

Təqsirləndirilənlərdən İsa İbrahimov Baş Mütəşəkkil Cinayətkarlıqla Mübarizə İdarəsində işgəncələrə məruz qalmalarından danışıb: “Bandotdel” bizə on gün “qonaqlıq” verdi. Allah elədiklərini qabaqlarına çıxaracaq. Mən Nardaran hadisələri olanda Kərbəlada idim. Elədiklərinə görə hamısı lənətə gələcək, hamısını MTN-çilər kimi Kürdəxanı gözləyir”.

Vəkillərin qaldırdığı vəsatətlərdən yalnız hal şahidlərinin dindirilməsi qəbul olunub. Hakim deyib ki, əsas şahidlərin dindirilməsi başa çatandan sonra həmin şahidlər dindirilə bilər.

Məhkəmə yanvarın 13-nə təyin edilib.

  • Yazılıb
  • da (də) 2017 Jan 01
  • Göndərən مدير سايت Aran News