Meydan TV-yə “Azərsu” ASC-də məsul vəzifədı çalışan, işini itirməmək üçün adının açıqlanmasını istəməyən mənbə belə deyib. Onun deməsinə görə, mikrobların öldürülməsi üçün suyun tərkibinə vurulan dərman hər il xaricdən alınırmış. Bu il alınmayıb. Səbəb kimi də büdcədə pulun olmaması göstərilib:
““Ceyranbatan Su Anbarı” hər il həmin dərmanlarla təmizlənirdi. Bu il dərman alınmadı, dedilər: “Pul yoxdur”. Tapşırdılar ki, su istifadəyə belə verilsin. Nəticədə əhaliyə tərkibi təmizlənməyən su verildi. Axırı da belə oldu. Uşaqların orqanizmi daha həssas olduğundan infeksiya onlarda biruzə verib”.
Hələ 4 il öncə Azərsu" ASC-nin mətbuat xidmətinin rəhbəri Anar Cəbrayıllı mövqe.az-a suyun xlorlanması ilə bağlı açıqlama verib. Bildirib ki, xlor suyun tərkibindəki bakteriyaları, zərərli maddələri, virusları, mikrobları öldürmək üçün ən təsirli vasitədir:
“Bütün dünyada zərərsizləşdirmədə xlordan istifadə olunur. Xlor ucucu maddədir, həmişə suda qalmır. Biz bu gün Kür sutəmizləyici qurğular kompleksindən Bakıya su veririksə, onu birinci mərhələdə Kürdə xlorlayırıq. Su Sənəaçal nasosxanasına gələnə qədər xlor onun tərkibindən uçur. Bakıda anbarlarda da su xlorlanıb istehlakçılara verilir. Bu sistem daim nəzarətdədir”.
Meydan TV “Azərsu” ASC-dən hazırda suyun tərkibinə xlor vurulub-vurulmaması ilə bağlı suala cavab ala bilməyib.
Mənbə suyun tərkibinin təmizlənmədiyini, buna əsas kimi də büdcədə pulun olmadığını göstərdiklərini deyir. Halbuki 2017-ci il fevralın 24-də prezident İlham Əliyevin sərəncamı ilə əhalinin içməli su ilə təminatına 16 milyon manat ayrıldı. Sərəncamda deyilir ki, Azərbaycanda əhalinin keyfiyyətli içməli su ilə təminatının yaxşılaşdırılması üçün 2007-16-cı illərdə 24 rayonda modul tipli sutəmizləyici qurğular quraşdırılıb. 6143 ədəd supaylayıcı məntəqə tikilərək istifadəyə verilib.
Həmin sərəncama əsasən, əhalinin içməli su ilə təminatının yaxşılaşdırılması üçün 2017-ci ilin dövlət büdcəsindən 16 milyon manat ayrılıb.
2017-ci il iyunun 5-də isə prezident daha bir sərəncamla əkin sahələrinin suvarılması, əhalinin içməli suya tələbatının ödənilməsi üçün daha 10,5 milyon manat ayırıb. Toplam 26,5 milyon.
“Uşaqlardan götürülən nümunələrin laboratoriya müayinələrinin nəticələrinə görə, onlarda “Rotavirus” infeksiyası aşkarlanıb”, - Səhiyyə Nazirliyinin iyunun 12-də verdiyi açıqlamada belə deyilir.
Nazirliyin Gigiyena və Epidemiologiya Mərkəzinin direktoru İmran Abdullayev lent.az-a bildirib ki, bu virus infeksiyası azyaşlı uşaqlar arasında baş verən bir xəstəlikdir və əsasən sudan keçir:
““Rotavirus”un yayılma yolunun əsasən su olduğu nəzərə alınaraq, infeksiyanın səbəbinin su şəbəkəsi olduğu ehtimal edilir. Buna görə suyun təmizlənməsi istiqamətində tədbirlər ciddi nəzarətə götürülüb”.
İmran Abdullayev iyunun 9-10-da götürülmüş su nümunələrinin nəticələrinin təmiz çıxdığını, standartlara cavab verdiyini deyir:
“Amma uşaqlarda kütləvi zəhərlənmə halı iyunun 7-də olub. Həmin gün suyun tərkibində nəyin olub-olmadığına dair nə isə demək mümkün deyil. Çünki ayın 7-dən sonra suda xlorlama işləri aparılıb”.
İyunun 9-10-u Tağıyev və Ceyranbatan qəsəbələrindən 119 uşağın zəhərlənmə əlaməti ilə Sumqayıtdakı xəstəxanalara aparılıb. Uşaqlardan bir hissəsi ilkin müdaxilədən sonra evə buraxılıb. 60-a yaxını isə xəstəxanaya yerləşdirilib.
Valideynlər infeksiyanın sudan düşdüyünü təxmin edirlər. Ancaq “Azərsu” ASC yaydığı bütün açılamalarda zəhərlənmənin sudan olmadığını bildirir.