Azərbaycanın xarici dövlət borcu 1 iyul 2017-ci il tarixinə 7172,6 mln. ABŞ dollarıdır (12208,5 mln. manat).
Maliyyə Nazirliyindən “Report”a verilən məlumata görə, xarici dövlət borcunun ümumi daxili məhsula (ÜDM) olan nisbəti isə 18,9% təşkil edib. Cari ilin əvvəlinə nisbətən borcun həcmi 3,75% artıb, onun ÜDM-ə nisbəti isə 1,5 faiz bəndi azalıb.Borca hökumətin birbaşa öhdəlikləri və dövlət zəmanətilə cəlb edilmiş kreditlər üzrə şərti öhdəliklər daxil edilib. Xarici dövlət borcu, əsasən, beynəlxalq maliyyə institutlarının kredit proqramlarından və infrastruktur layihələrindən, həmçinin beynəlxalq maliyyə bazarlarında yerləşdirilmiş qiymətli kağızlardan ibarətdir.
Natiq Cəfərli. Fotoqraf:: Meydan TVİqtisadçı Natiq Cəfərlinin sözlərinə görə, açıqlanan rəsmi rəqəmlər də göstərir ki, Azərbaycanın xarici borcu sürətlə artır:
“Xarici borcun hesablama qaydaları da rəsmi statistikada fərqlidir. Rəsmi statistikada Azərbaycanın aldığı kredit borcları göstərilir, halbuki dövlət xətti ilə əlavə müqavilələr də bağlanıb, o müqavilələrə görə 11 milyard dollardan çoxdur. Hələ ki, bu müqavilələr realizə olunmağa başlamayıb, gələn ilin əvvəlindən xarici borc kəskin artacaq. Beynəlxalq praktikada dövlət zəmanəti ilə götürülən borcların özü də dövlətin öhdəliyi kimi qəbul olunur. Bunu “Beynəlxalq Bank”ın təcrübəsində də gördük. Dövlət borcun öhdəliyini öz üzərinə götürməyə məcbur oldu. Dövlətin öhdəliyi ilə götürülən digər borcları da bu siyahıya əlavə etsək, görərik ki, bu, ümumdaxili məhsulun yarısına yaxınlaşır, hətta bəzi hesablamalara görə yarısından da artıqdır”.