Hər il olduğu kimi bu il də dünyanın hər bir yerindən Ərbəin günü ilə əlaqədar milyonlarla insan müqəddəs Kərbəlaya yollanır. Böyük izdihamla zəvvarlar İmam Hüseynin (ə) müqəddəs məzarını ziyarət edirlər.
Qonşu ölkə - Gürcüstanda azərbaycanlıların sıx yaşadığı bölgələrdə də İmam Hüseyn (ə) məclisləri keçirilir və müqəddəs torpaqlara səfərlər baş tutur.
Gürcüstan Müsəlmanları İdarəsinin şeyxi Hacı Ramin İgidov İslamazeri.com-a bildirib ki, Gürcüstandan Kərbəlaya yola düşən zəvvarların sayı 200-dən çox olur: "Gürcüstanda hər il məscidlərdə "Ərbəin" haqqında təbliğatlar aparılır. İlbəil məscidlərdə mərasimlər daha da izdihamlı keçirilir. Əvvəllər belə deyildi, son zamanlar "Ərbəin"ə verilən qiymət daha da çoxalıb. Məndə olan məlumata görə, Kərbəlaya səfər edən zəvvarların sayı 200-dən çox olur".
R.İgidov bildirib ki, ziyarət səfərləri idarə tərəfindən təşkil edilməsə də, gələcəkdə belə turlar üçün danışıqlar aparılır:
"İnsanların maddi durumu o qədər də yaxşı vəziyyətdə deyil, xüsusilə inanclılarda. Müəyyən qurumlarla danışmışıq ki, bizə şərait yaratsınlar, sərfəli qiymətə təşkil olunsun və hamı Kərbəlaya səfər edə bilsin. Bunu proqram şəklində həyata keçirmək istəyirik ki, hər il bir neçə dəfə Kərbəlaya turlar təşkil edək. İdarə tərəfindən Məşhəd ziyarətləri ildə 4 dəfə təşkil olunur, gələn ildən isə "Ərbəin" ziyarətlərini təşkil edəcəyik. Onu qeyd edim ki, həcc səfərinə təxminən 70 nəfər yollanırdısa, Kərbəlaya 200-dən çox insan səfər etməyə hazırlaşır".
Ümumi Gürcüstan Müsəlmanları Ali Dini İdarəsinin sədri Mirtağı Musəvi İslamazeri.com-a bildirib ki, rəhbərlik etdiyi qurumun və İmam Əli (ə)
adına xeyriyyə fondunun təşkilatçılığı ilə İmam Hüseyni (ə) qəbrini ziyarət məqsədi ilə Ərbəin səfəri təşkil olunur. İraqın Nəcəf və Kərbəla şəhərlərinə üç gün piyada yol gedilir. Zəvvarların sayına gəldikdə isə M.Müsəvi 150-ə yaxın inanclının qurumları tərəfindən müqəddəs torpaqlara səfər etdiyini söyləyib.
Gürcüstan “Əhli-beyt” (ə) cəmiyyətinin sədri, Marneuli şəhərinin imamcüməsi Hacı Rasim Məmmədov da İslamazeri.com-a bu haqda danışıb.
Hacı Rasim Məmmədov bildirib ki, Ərbəin günü Gürcüstanda da böyük vüsətlə keçirilir: "Möminlik, əmanətə sədaqət və Kərbəlada şəhadətə yetənlərin xatirəsini əzizləmə ənənəsi olan Ərbəin islam aləminin digər yerlərində olduğutək Gürcüstanda da dindarlarımız tərəfindən böyük vüsətlə keçirilir. Yerli möminlər İmam Hüseyn (ə) və digər Kərbəla şəhidləri üçün əza saxlayır, mərasimlər keçirirlər."
İmamcümə vurğulayıb ki, Gürcüstan müsəlmanlarının böyük hissəsi, Əhli-beyt (ə) aşiqləri Ərbəini din ocaqlarımızda, məscidlərimizdə möhtəşəm şəkildə qeyd edirlər: "Ərbəin son üç ildəPeyğəmbərimizin (s) və Əhli-beytin (ə) sədaqətli səhabələrindən olan Qeys ibn Səd ibn Übadənin bölgəmizdəki türbə-ziyarətgahında da keçirilir. Əziz Peyğəmbərimizin (s) yadigarına olan əhdlər təzələlənir. İllər ötdükcə qədim Əhli-beytsevərlər diyarı olan Gürcüstanda da Ərbəin məclisləri rövnəq tapır".
R.Məmmədov qeyd edib ki, hazırda 300-ə yaxın gürcüstanlı mömin və möminə Tiflis Əhli-beyt (ə) məscidi, Gürcüstan Müsəlmanları Ali Dini İdarəsi və Marneuli İmam Əli (ə) Məscidi tərəfindən təşkil olunmuş Ərbəin ziyarətinə yola düşməyə hazırlaşırlar.