Vəkil Cavad Cavadov 17 saylı Cəza Çəkmə Müəssisəsində saxlanılan ilahiyyatçı Sərdar Babayevlə görüşüb.
Arannews-Bu barədə Rakurs TV-ə Cavad Cavadov məlumat verib. O, Sərdar Babayevin cinayət işi üzrə Ali Məhkəmədə keçiriləcək məhkəmə baxışının tarixini də açıqlayıb. Vəkilin sözərinə görə, verilən kassasiya şikayəti üzrə məhkəmə prosesi 30 yanvar saat 11:00-a təyin olunub. İşə hakim Gülzar Rzayevanın sədrliyi ilə baxılacaq.
Cavad Cavadov
Vəkil Sərdar Babayevin məhkəmədə iştirak etmək fikrində olduğunu qeyd edib. Cavad Cavadov bildirib ki, ilahiyyatçı bununla bağlı daha bir müraciət edib: "Məhkəmədə edəcəyi çıxışının detallarını müzakirə etdik. Ümid edirik ki, Ali Məhkəmədə Sərdar Babayevin azadliğa buraxılması barədə qərar qəbul olunacaq".
Sərdar Babayev 2017-ci il fevralın 22-də həbs edilib. Masallı rayon Məhkəməsinin hökmü ilə 3 il azadlıqdan məhrum edilib. Ona Cinayət Məcəlləsinin 168-1.1.3-ci (İslam dininə aid ayin və mərasimlərin xaricdə dini təhsil almış Azərbaycan vətəndaşı tərəfindən aparılması -təkrar törədildikdə) maddəsi ilə ittiham verilib.
Yerli rəsmilər bildiriblər ki, S.Babayev xaricdə dini təhsil alıb. Azərbaycanın mövcud qanunları onun dini mərasim idarə etməsinə icazə vermir. S.Babayevə dəfələrlə Masallı rayonundakı məscidə gedib xütbə oxumaması haqqında xəbərdarlıq edilib. Ancaq o, bu xəbərdarlığı eşitməyib.
Müdafiə tərəfi bildirir ki, S.Babayev qanunvericiliyə həmin məhdudlaşdırıcı maddə əlavə edilməzdən öncə xaricdə dini təhsil alıb. Habelə, Qafqaz Müsəlmanları İdarəsində vəzifə tutan bir çox şəxslər də xaricidə dini təhsil alıb.
Qeyri-rəsmi mənbələr hesab edir ki, S.Babayev həmişə məsciddə oxuduğu xütbələrdə ölkədəki problemlərdən bəhs edib və tənqidi fikirlər səsləndirib.
Sərdar Babayev məhkəmə zamanı ittihamı sifariş kimi qiymətləndirib. O bildirib ki, xaricdə ali məktəbi 2000-ci ildə bitirib, yuxarıda qeyd edilən məhdudiyyət isə 2015-ci ildə tətbiq edilib.