Tarix : 2018 Mar 05
Kod 54574

Ərdəbil Dövlət Universitetində möhtəşəm Qarabağ tədbiri -

Ərdəbil Universitetinin rektoru professor Qudərz Sadiqi: “O oyunları ki, ermənilər müsəlmanların başına gətiriblər, əgər müsəlmanlar ermənilərin başına gətirsə, biz ermənilərin yanında duracaqdıq”
Arannews-Forumda Beynəlxalq Xocalı gününün təsis olunması təklif edildi; “Erməni yalnız torpağımıza yox, dinimizə, inancımıza təcavüz edib”
Ərdəbildə Qarabağ probleminə həsr olunmuş beynəlxalq konfrans, həmçinin İşğala və Terrora Qarşı Beynəlxalq Forumun (Beynəlxalq Qarabağ Forumu) dördüncü toplantısı keçirildi. “Yeni Müsavat”ın əməkdaşının da iştirak etdiyi tədbir girişində və tədbir salonunda Xocalı soyqırımını əks etdirən fotoların asıldığı Ərdəbil Beynəlxalq Universitetində baş tutdu.
12 min tələbənin təhsil aldığı, 900 müəllimin çalışdığı Ərdəbil Dövlət Universitetindəki nəhəng toplantıda Azərbaycan, İran və Türkiyə nümayəndə heyətləri iştirak edirdi. Toplantıda ilk olaraq Qurani-Kərim oxundu.  Ardınca tədbirə ev sahibliyi edən növbəti ölkənin, İranın dövlət himni oxundu. Tədbirə universitetin müəllimi Şeyda xanım Müzəffəri yüksək səviyyədə moderatorluq edirdi. O, “Dostluq və barış görüşü” adlandırdığı tədbiri açaraq iştirakçılara və qonaqlara “xoş gəldiniz” dedi.
Ərdəbil Univerfsitetinin rektoru (rəisi) doktor, professor Qudərz Sadiqi forumda ilk olaraq çıxış etdi: “Hər birinizə xoş gəlmisiniz, deyirik. Özəlliklə İran İslam Respublikasına və qardaş Azərbaycan Respublikasına uğurlar arzulayıram. İnşallah gündən-günə ölkələrimizi inkişafda görək!” Rektor Rusiya, Azərbaycan, Türkiyə və Gürcüstan nümayəndələrinin  təsisçiliyi ilə yaradılmış Forumun önəmindən bəhs etməklə yanaşı, tədbirin ərsəyə gətirilməsinə görə QAT sədri Akif Nağıya məxsusi təşəkkür etdi: “Ərdəbilin İmam-cüməsi Seyid Həsən Amili tədbirdə iştirak edə bilməsə də, salamlarını çatdırmağı xahiş etdi. Ancaq bilirik ki, nümayəndə heyətinin səfərinin ilk günü Seyid Həsən Amili ilə çox vacib və maraqlı görüşü olub”.
Q.Sadiqi rəhbərlik etdiyi Ərdəbil Universiteti barədə danışarkən dedi ki, burada Azərbaycan Mədəniyyət və Tədqiqat Mərkəzi adında təşkilatımız da var. Ardınca Qarabağın işğalından bəhs etdi, bu problemin onları da narahat etdiyini söylədi: “İranda çox az adam var ki, Azərbaycan-Ermənistan müharibəsindən xəbərsizdir. Biz çalışırıq ki, baş verənləri öz millətimizə, həmçinin başqa millətlərə çatdıraq. Bizim dövlətimiz və millətimiz Qarabağ müharibəsində öz sözünü deyib. Ona görə yox ki, Qarabağda şəhid olanlar müsəlmandır. Ona görə ki, onlar haqq tərəfdarıdır. O oyunları ki, ermənilər müsəlmanların başına gətiriblər, əgər müsəlmanlar ermənilərin başına gətirsə, biz ermənilərin yanında duracaqdıq. Əgər müsəlmanlar bu oyunları yəhudilərin başına gətirsəydilər, biz o halda yəhudilərin yanında duracaqdı”. Rektor Xocalı dəhşətlərinə diqqət çəkib həmin dəhşətlər zamanı 613 nəfərin, həmçinin 63 uşağın şəhid olduğunu iştirakçı tələbələrin diqqətinə çatdırdı. “O insanların 53-ünü vəhşicəsinə qətlə yetirdilər, odladılar, başlarını kəsdilər, gözlərini çıxartdılar, bədənlərini doğradılar. 25 uşaq həm atasını, həm də anasını itirdi. Bu dəhşətlərdən sonra Ermənistanda dedilər burada 3 nəfəri öldürdük”.
Q.Sadiqi dedi ki, Xocalı soyqırımı onlar üçün böyük faciədir: “Allahdan istəyirik ki, şəhidlərimizə rəhmət eləsin, Xocalının Azərbaycana qaytarılmasında yardımçı olsun və bizə də haqqın yanında dayanmağa imkan versin. Bu tədbirdə iştirak etmək bizimçün böyük şərəfdir”.
Ərdəbil Universitetin tarix müəllimi doktor Əsədi əvvəlcə Xocalı soyqırımı, Qarabağda baş verənlər barədə Ərdəbildə doğru-dürüst məlumatın olmadığını etiraf etdi: “Xocalının harada yerləşdiyi və orada nə baş verdiyi barədə mənə sual verirlər. Deməli, Xocalıda baş verənlər haqqında bizim xalqımızda hələ tam məlumat yoxdur”. Doktor Əsədi daha sonra Xocalıda baş verənlər barədə ətraflı məlumat verdi: “Qafqazda baş verən digər faciələr kimi, Xocalıda baş verənlərdə də Rusiyanın əli var idi. 1992-ci ildə Rusiyanın 366-cı alay ermənilərlə birlikdə Xocalıya girdi, Xocalı kimi kiçik şəhərdə 613 nəfər müsəlman qətlə yetirildi, 1500 nəfər isə əsir alındı. Əslində bu, çox böyük faciədir. Çünki əsas hədəf müsəlman əhalini bütövlükdə silib atmaq idi. Xocalının əhalisi hətta Ərdəbil şəhəri qədər olsaydı və ermənilərin gücü yetsəydi, həmin əhalini də qırıb çatacaqdılar”. Doktor  Əsədi dedi ki, Xocalıda baş verənlər aysberqin görünən izidir. O, Azərbaycanın torpaqlarında erməni dövlətinin yaradılması istiqamətində həyata keçirilən xain planlardan danışdı: “Xocalıda baş verənlər Pyotrdan başlayan Qafqazda xristian dövləti qurmaq həvəsinin tərkib hissəsidir. O zaman çox az sayda olan ermənilər Çara məktub göndərib dedilər ki, əgər İranla döyüşmək istəsələr, onlar Rusiyanın tərəfində döyüşəcəklər. O zaman Nadir şahın güclənməsi ermənilərin dövlət həvəsinin üstündən xətt çəkdi. Amma Yekaterinanın vaxtında ermənilər yenidən dirçəldi və onlar yenidən Rusiyaya müraciətlər etdilər. Ermənilərlə danışıqlar aparıldı və müqavilə imzalandı. Ancaq Şah Qacarın zühuru və onun Tiflisə hücumu ermənilərin İslam coğrafiyasının içində dövlət qurmaq arzuları qursaqlarında qaldı. Qacarın ölümündən sonra ruslar fürsət bilib Qafqaza hücuma keçdilər. Bu zaman ermənilər də müsəlmanların üzərinə hücum etdilər. Ermənilərin xəyanəti nəticəsində Gəncə qalası ələ keçdi, Cavad xan qətlə yetirildi, ardınca İrəvan ermənilərin xəyanəti ilə İrəvan ələ keçirildi və ruslar Təbrizə hücuma keçdi”. Natiq daha sonra Qriboyedovun erməniləri İrəvana köçürüb erməni əyaləti qurmaq planını işə salındığını söylədi. Xatırlatdı ki, o zaman İrəvanda erməni əhali 20 faizdən çox deyildi. Məruzəçi ötən əsrin əvvəlində ermənilərin törətdiyi soyqırımlardan, ermənilərə Azərbaycan ərazisində dövlət yaradılmasından, Dağlıq Qarabağ Muxtar Vilayətinin zor gücünə təsis olunmasından və nəhayət, əsrin sonunda ermənilərin Qarabağda özləri üçün dövlət elan etməsi barədə geniş məlumat verdi.
“Biz dünyanın istənilən ölkəsində terroru lənətləyirik. Çünki biz  də İran olaraq terror və işğaldan zərər görmüşük. Ərdəbil şəhəri özü terrorda şəhid verib. Şəhid Pirzadə bu şəhərin adlı-sanlı terror şəhidlərindəndir”.
Bu fikirləri isə Təbriz Universitetinin müəllimi Ruhulla Mütəfəkkiri Azad söylədi. Azərbaycan ərazilərinin işğalından bəhs edən natiq aparılan sülh danışıqlarının perspektivini görmədiyini söylədi və Qarabağın güzəşt edilməsinin mümkünsüz olduğunu bəyan etdi: “Minsk Qrupu kömək edə bilsəydi, indiyədək etmişdi. Əslində Minsk Qrupunun yaradılmasında məqsəd budur ki, Qarabağ münaqişəsi daim bizim ürəyimizdə qalsın. Qarabağla bağlı geri çəkilmək mümkünsüzdür. Kimsə düşünsə ki, bu torpaqların yarısından keçə bilərik, ya hardasa geri çəkiləcəyik, bu, mümkünsüzdür! Necə ki, biz Xürrəmşahda dayandıq, durduq. İsrarlı olmasaydıq, oranı bizə verməyəcəkdilər. Fələstin məsələsində də sonadək dayanmalıyıq, yoxsa qələbə qazana bilməyəcəyik”. Bununla belə, Ruhulla Mütəfəkkiri Azad bəzi dövlətlərin hansısa formada tənzimləmə prosesində iştirakına qarşı çıxdı, həmçinin İsrail əleyhinə kəskin fikirlər səsləndirdi: “Qarabağ münaqişəsində pak suyumuzu murdar suya qatmayaq! İsrail bizə Qarabağ münaqişəsində kömək edə bilməz, əksinə, pak suyumuzu murdar edər. Ona görə də İslam ölkələri, öz qonşularımızla bir yerdə torpaqlarımızı azad edək”.
“Qarabağla bağlı bu qədər ki, işlər görülür, tədbirlər keçirilir, inşallah sonda Qarabağı azad edəcəyik”. Bunu isə “Təbriz” qəzetinin baş redaktoru Forumun üzvləri Hamid Xosrovşahi çıxışında dedi. Baş redaktor İran-Azərbaycan münasibətlərinə xələl gətirmək istəyənlərə cavab olaraq bunları bildirdi: “İranda iki xalqımızın ağsaqqalının - Doktor Cavad Heyətin bir kitabı çıxıb. Doktor İranın o dövrdə Azərbaycana yardımlarından yazıb. Dərman köməyindən, yaralıların Tehranda müalicə olunmasından, hərbi dəstəkdən bəhs edib. Rəhmətlik Haşimi Rəfsancaninin də işğal dövrü ilə bağlı xatirələri çıxıb. Orada da İranın Azərbaycana kömək etməsindən bəhs olunub”.
Hamid Xosrovşahi də sülh danışıqlarının faydasızlığına diqqət çəkdi: “Biz bu gün əlimizi əlimiz üstə qoyub, Minsk Qrupunun məsələni həll edəcəyini gözləməməliyik, özümüz hərəkət etməliyik. Allahdan istəyirəm ki, Akif Nağının öncüllüyü ilə Xocalıya əvvəlinci girənlərdən olaq, Allah bizə Xocali məscidində namaz qılmaq fürsəti versin!” Ürəyi Qarabağ sevdası ilə döyünən təbrizli baş redaktorun bu sözləri “AMİN” sədası və alqışlarla qarşılandı.
Ərdəbil Universitetinin müəllimi, doktor Mirzə Rəsulzadə “Xocalı” şeirini söylədi və hər kəsi təsirləndirdi.  Ardınca Xocalı soyqırımının dəhşətlərindən bəhs edən film təqdim olundu.
QAT sədri Akif Nağı çıxışında Xocalı soyqırımına biganə qalmadıqlarına, soyqırımın ildönümü ilə bağlı konfransın və forumun keçirilməsinə yardımçı olduqları üçün qonşu İran dövlətinin hökumətinə, həmçinin Ərdəbil vilayətinin və Ərdəbil Universitetinin rəhbərliyinə təşəkkür etdi: “Mən təşəkkür edirəm ki, dördüncü toplantımız Ərdəbildə keçirilir. Bu, bir daha sübut etdi ki, düşmənlər nə qədər çalışsalar da, bizim aramıza girə bilməyəcəklər. Biz bir yerdə işğala və terrora qarşı mübarizə aparıb, inşallah qalib gələcəyik. Burada Ərdəbil ictimaiyyəti, universitetin müəllim və tələbə heyəti, din xadimləri iştirak edir, onları səmimi qəlbdən salamlayırıq”. QAT sədri bildirdi ki,  texniki səbəblərdən Rusiya və Gürcüstan nümayəndələri konfransda iştirak edə bilmədi: “Amma İran, Türkiyə və Azərbaycan nümayəndələri burada iştirak edir və bu konfrans tam legitimdir”.
A.Nağı daha sonra ötən əsrin faciəsindən danışdı. Bildirdi ki, Xocalı soyqırımını dünyaya, o cümlədən İslam dünyasına yaymaq üçün çox işləməliyik: “Bu, həm də bizim faciəmizdir ki, dünya Xocalı həqiqətlərindən xəbərsizdir. Çıxaq Təbrizdə sorğu keçirək, görərik ki, xeyli insan Qarabağla, Xocalı soyqırımı ilə bağlı məlumatsızdır. Ona görə də belə tədbirlərin keçirilməsi çox vacibdir”.
A.Nağı dedi ki, böyük güclər tarix boyu ermənilərdən, son əsrdə də Ermənistandan istifadə ediblər: “Ermənilər indiki Ermənistan adlanan ərazidə yaşamayıb, onlar Ağqoyunlu dövründə orada məskunlaşmağa başlayıb, hətta Şah Abbasa məktub yazıblar ki, çox sağ olun, Eçmiədzinə köçməyimizdə bizə yardım etdiniz. Yəni bu, bir tarixdir, sənədlər ortadadır. Ermənilərin Qarabağla heç bir əlaqəsi yoxdur”. Məruzəçi dedi ki, bütün tarixi faciələrimizin başında Rusiya dayanıb, Ermənistan adlı dövləti də Rusiya yaradılıb: “Rus çarı işğal etdiyi Naxçıvan və İrəvan xanlığının yerində Erməni vilayəti yaratdı. Erməni əhalisinin sayı o zaman heç 0, 1 faiz də deyildi”.  A.Nağı İslam dünyasını erməni işğalına, terroruna və vəhşiliyinə qarşı konkret addımlar atmağa çağırdı: “Biz anım mərasimləri keçirməklə, ağlamaqla kifayətlənməli deyilik. Məsələn, biz təklif edirik ki, hər il Beynəlxalq Qüds günü keçirildiyi kimi, Beynəlxalq Xocalı günü də təsis olunmalıdır. Ən azı İran və Türkiyə bununla bağlı təşəbbüs göstərməli, həmin gün Azərbaycanda olduğu kimi, məktəblərdə Xocalı günü, Xocalı saatı keçirilməlidir. Necə ki, Beynəlxalq Qüds günü keçirilir. Biz konfranslarımızda çalışıb nəticəyə nail olmalıyıq. İslam Konfransı Təşkilatı Ermənistanın işğalını pisləyən qətnamələr qəbul edib. Nəhayət, o qətnamələrin yerinə yetirilməsi istiqamətində işlər görülməlidir. Hər kəs bilməlidir ki, Dağlıq Qarabağ məsələsi bütün İslam dünyasının məsələsidir. Dünya bu gün iki hissəyə bölünüb: İslam dünyası və xristian dünyası. İŞİD-i yaradanlar, terroru dəstəkləyənlər üstümüzə gəlirlər, iki din arasında cəbhə xəttini məhz onlar yaradıblar. Biz İslam aləmi olaraq Fələstin, Kəşmir, Yəmən, həmçinin də Qarabağ məsələsində güzəştə gedə bilmərik”. QAT sədri Qarabağın işğalının elə İran üçün də təhlükələr vəd etdiyi barədə xəbərdarlıq etdi: “Təsəvvür edin ki, sabah ABŞ gəlib Qarabağda oturdu, o halda İran üçün hansı təhlükələr . Qarabağda xristianlar qalib gəlsə, İrana da təhlükələr yaranacaq, məlumdur. Həmçinin də Türkiyə üçün. Ona görə də birləşib Qarabağın azad olunmasına nail olmalıyıq”.
“Xocalı faciəsi əsrin görünməmiş faciəsidir. Oradakı insanlar məhz azərbaycanlı olduqları üçün bu faciəyə düçar oldular. Soyqırım nəticəsində 8 ailə tamamilə məhv edildi, 25 uşaq hər iki valideynlərini itirdi. Biz bu faciələri ona görə yaşadı ki, zaman-zaman baş verənləri unutduq, yaxud bizə unutdurdular”. Bunu isə Dünya Azərbaycanlılarının Vətənpərvərləri İctimai Birliyinin rəhbəri Nəsimi Qarabağlı söylədi. 
Bundan sonra QAT sədri Akif Nağı Forumun adının dəyişdirilərək Beynəlxalq Qarabağ Forumu adlandırılmasını təklif etdi. Təklif qəbul edildi. Ardınca A.Nağı Ərdəbilin İmam-cüməsi Seyid Həsən Amilinin Forumun fəxri üzvü olmaq istəyini forum iştirakçılarına çatdırdı. İştirakçılar İmam-cümənin və Ərdəbil Universitetinin Foruma üzvlüklə bağlı müraciətini müsbət qarşıladılar.
Türkiyə Şəhid Ailələri və Qazilər Dərnəyinin başqanı Mühsin Ağçay çıxışında Forum iştirakçılarını salamladıqdan sonra erməni işğalından danışdı, onların bölgə üçün təhlükə yaratdığını bildirdi: “Biz ermənilərlə PKK-nın işbirliyi şəraitində törədilən terrorun, erməni zülmünün nə demək olduğunu çox yaxşı bilirik. Bu barədə dədələrimizdən də eşitmişik. Azərbaycan torpaqları işğal edilib və 1 milyon insan torpaqlarından qovulub. Ermənilərin türklərə qarşı nifrəti 100 ildir davam edir. Son olaraq Xocalıda soyqırım törətdilər. Biz Azərbaycanla bir millət iki dövlətik, Mustafa Kamal Atatürk demişkən, Azərbaycanın sevinci bizim sevincimiz, kədəri kədərimizdir”. Mövsüm bəy dedi ki, Türkiyənin Afrində terrora qarşı savaşından da bəhs etdi: “Azərbaycanın, İranın bizə dəstək verməsi lazımdır. PKK ilə mübarizədə minlərlə şəhid vermişik. Gəlin hamımız terrora qarşı birgə mübarizə aparaq. Biz Afrində təkcə PKK, ya PYD ilə deyil, ingilis, amerikan, fransız, almanlarla savaşırıq”.
“İran Qarabağ məsələsində Azərbaycana dəstəyini əsirgəməyib, bu, tarixi faktdır, unudulmayıb, unudulmayacaq da”. Bunu Qarabağ Uğrunda İslami Müqavimət Hərəkatının rəhbəri Hacı Rövşən Əhmədli çıxışında söylədi. Əlavə etdi ki, Qarabağ uğrunda mübarizə yalnız coğrafiya mübarizəsi deyil: “Bu gün dünyada ləyaqət, şərəf, izzət müharibəsi gedir. Bu gün haqqa təcavüz edirlərsə, şərəfi olan hər kəs ona qarşı mübarizə aparmalıdır. Allah bu torpaqlarda yaşamağı bizə buyurub. Erməni təkcə bizim torpaqlarımıza yox, Allahın haqqına təcavüz edib! Bizim yalnız torpağımıza yox, dinimizə, inancımıza təcavüz ediblər. İnşallah İslam dünyasının birliyi ilə bu yaraları sağaldacağıq”.
Azərbaycan Ziyalılar Birliyinin sədri Eldəniz Quliyev Forumun əsas təşkilatçılarından biri olan Seyid Amiliyə həssas münasibətinə görə təşəkkür etdi. Daha sonra E.Quliyev erməni vəhşiliklərindən bəhs edən xatirələrini bölüşdü. Dedi ki, rejissor olaraq “Haray” filmini çəkərkən bir dəhşətli hadisənin şahidi olub: “Biz çəkiliş apardığımız ərazidə döyüş təzə qurtarmışdı, bir çox əsgərlər qan içindəydi. Ordumuz bir kəndimizi düşməndən azad etmişdi. Əsgərimiz gətirib bir ağac göstərdi, gördüm ki, budaqlardan qadın hörükləri asılıb. Sonra mənə izah etdilər ki, ermənilər Xocalıdan əsir götürdükləri əsirləri buradan asıblar, meyit ağırlaşıb, düşüb, saç qalıb ağacda. İnsan ağlayanda həblə sağaltmaq olur. Hesab edirəm ki, milləti sağaltmaq üçün qardaş sevgisi ona dərman olar. Bu dərd də keçəcək. Çox güman ki, yaralar uzun zaman qaysaq bağlamayacaq. Amma bu dərddən xilas olmağın yolu bizim bir-birimizə sevgidən keçir”. E.Quliyev İran-Ermənistan münasibətləri barədə narahatlıqların olduğunu da vurğuladı: “Çox istərdik ki, İran rəhbərliyi Ermənistan rəhbərliyi ilə münasibətlərdə bunu nəzərə alsın”.
 “Kədərlənməklə, göz yaşı tökməklə işimizin bitdiyini düşünsək, vay bizim halımıza”. Bunu isə Əsgər Analarına Dəstək İctimai Birliyinin sədri Növrəstə İbrahimova söylədi. Xanım çıxışçı bildirdi ki, biz daim zalıma yox deyəcəyik: “Terrorizm və işğal insanlığın düşmənidir. İçimizdə pislər var deməyə dilim gəlmir. Amma bilməyənlər var bizim borcumuzdur ki, onları məlumatlandıraq.Torpağa su axanda palçıq olar, amma qan qarışanda ondan Vətən tikilər. Vətənin uğrunda canından keçən şəhidin qanı özündən sonra qalan xalqının şah damarına axır. Minsk Qrupu 26 ildir bölgədə qara lövbər salıb. Bizə onlardan yardımçı olmaz. Bütün dünyaya işğalçı olduğu məlum olan dövlətin gəlib digər işğala məruz qalan ölkəyə yardım etməsi mümkünsüzdür. Mən özüm əslən Zəngilanlıyam, ordan çıxanların bütün ah-fəryadını gözümlə görmüşəm, orada yardım edənləri də qəlbimin lentinə almışam”. Növrəstə xanım milli birliyə çağırdı: “İstər Arazın o tayı, istər bu tayı, fərqi yoxdur, eyni qəlblərdir, eyni insanlardır. Mən bunu ata-babamdan da eşitmişəm. Biz meydanda hazırıq, inşallah bu məsələnin həllini yalnız və yalnız müharibədə görürük”.
“Jurnalistlər Ekstremal Şəraitdə” təşkilatının rəhbəri Firuzə Əsədullayeva hərbi jurnalist kimi Qarabağ xatirələrini bölüşdü və ordumuzun qüdrətindən danışdı: “Allaha şükür olsun ki, bizim ordumuz çox qüvvətlənib. Bunu 2016-cı ilin aprel döyüşləri də bunu sübuta yetirdi. İslam dövlətlərinin dəstəyi ilə bütün xalqımız ayağa qalxacaq, qüdrətli ordumuz mütləq qələbə qazanacağıq. İnşallah düşməndən qisasımızı alacağımız günün hamımız şahidi olacağıq”.
Türkiyənin Qars vilayətindən Foruma qatılmış ictimai fəal Turqut Zaman isə dedi ki, dünya nəhayət, Xocalı soyqırımına qiymət verməlidir: “Biz Xocalı soyqırımını unutmadıq, unutmayacağıq! Qarabağın işğalını lənətləyirik və Azərbaycan torpaqlarının işğaldan azad edilməsini tələb edirik”.
Forumda Kəlbəcərdə girov düşən və bu günə qədər ermənilərin işgəncələr altında saxladığı Dilqəm Əsgərov və Şahbaz Quliyevin azadlığına nail olmaq üçün İslam dünyasına çağırış edildi. 
İşğala, Terrora və Əsassız İddialara qarşı Beynəlxalq Forumun İranın Ərdəbil şəhərində keçirilən Dördüncü (Ərdəbil) Toplantının sonunda Nəsimi Qarabağlı yüksək səviyyədə keçirilən Dördüncü (Ərdəbil) Forumunun qətnaməsini oxudu. Sənəddə deyilir ki, Dağlıq Qarabağ münaqişəsi Azərbaycanın ərazi bütövlüyü çərçivəsində öz həllini tapmalı, Ermənistanın işğalçı qüvvələri Azərbaycanın işğal olunmuş bütün ərazilərindən, o cümlədən Dağlıq Qarabağ bölgəsindən qeyd-şərtsiz çıxarılmalıdır. Əks halda, Azərbaycanın işğal olunmuş əraziləri hərbi yolla azad etmək haqqı beynəlxalq təşkilatlar, bütün dövlətlər tərəfindən tanınmalıdır.  (Sənədin tam mətni ayrıca dərc olunur-E.P.) Qətnamə müəyyən düzəlişlərlə səsə qoyularaq qəbul edildi. Yekunda A.Nağı Ərdəbil Universitetinin rəhbərliyinə xatirə hədiyyələri, Qarabağ həqiqətləri barədə kitablar və Azərbaycan bayrağını hədiyyə etdi.
Elşad PAŞASOY,
“Yeni Müsavat”
Bakı-Ərdəbil-Bakı

 

  • Yazılıb
  • da (də) 2018 Mar 05
  • Göndərən مدير سايت Aran News