Verilən məlumatlara görə Qəzzada yüzlərlə insan səhərin sübh saatlarından etibarən sərhəd boyu qurulmuş çadırlara toplaşaraq, sübh namazlarını bu çadırlarda qılıblar.
Qayıdış yürüşlərini və blokadanı yarmaq tədbirlərini təşkil etmək məqsədilə yaradılmış Milli Komitə, fələstinliləri şəhidlərin dəfni və anılması üçün keçiriləcək mərasimlərdə iştirak etməyə səsləyib. Milli Komitə aksiyaların qarşıdurma məqsədilə deyil, dinc aksiya məqsədli olduğunu qeyd edib.
Palinfo-nun müxbirlərinin verdiyi məlumata görə, şəhidlərin anım mərasimləri bu gün (6 aprel) günorta namazından sonra “Böyük qayıdış yürüşü” çadırlarında təşkil olunacaq.
Bu arada, Fələstin Səhiyyə Nazirliyinin sözçüsü doktor Əşrəf Əl-Kudra yazılı açıqlama verərək, "Böyük qayıdış yürüşü" vaxtı İsrail rejiminin əsgərləri tərəfindən yaralanan fələstinli Sair Məhəmməd Rabianın şəhid olduğunu bildirib.
Rabianın şəhid olması ilə cümə günündən etibarən Qəzzada İsrail rejiminin əsgərlərinin şəhid etdiyi fələstinlilərin sayı 22-yə yüksəlib.
Bugünkü aksiyalarda indiyə qədər sionistlərin hücumları nəticəsində 3 gəncin Cibaliyanın şərqində, bir gəncin də Qəzza şəhərinin şərqində yaralandığı və yerli xəstəxanalara yerləşdirildikləri bildirilib.