Azərbaycanda İran Mədəniyyət Günlərinin başlanması ilə eyni zamanda cümə axşamı “Məhəmməd Allahın elçisi” filmi nümayiş etdirilib. Filmin nümayişində İranın İslami irşad və mədəniyyət naziri Seyid Abbas Salehi və azərbaycanlı həmkarı Əbülfəz Qarayev də iştirak edib.
AranNews-in “İRNA”-ya istinadla verdiyi xəbərə görə, “Məhəmməd Allahın elçisi” filminin rejissoru Məcid Məcidi bu filmin Bakının Nizami mərkəzi konoteatrında nümayiş etdirilməsindən əvvəl çıxış edərək deyib: “Bu filmin Azərbaycan Respublikasında nümayiş etdirilməsi geciksə də, yenə də çoxlu mədəni ortaqlıqlarımız olduğu qonşu ölkədə ekrana çıxmasına sevinirəm. Ümid edirəm ki, bu mədəni ortaqlıqlar iki ölkə arasında film sahəsində münasibətlərin genişlənməsinə səbəb olacaq.”Məcid Məcidi əlavə edib: “Bu gün Azərbaycan KİV-i ilə keçirdiyim mətbuat konfransında bu ölkə xalqının kino filmləri çox sevdiyini gördüm. Bu çox dəyərlidir.”Kinorejissor filmin çəkilməsi barədə də açıqlama verərək deyib: “Film İran və dünya film sənətkarlarının 7 il il təlaşları sayəsində başa gəlib. Filmin çəkilməsinin səbəbi 12 il bundan öncəyə qayıdır. Danimarkada təşkil edilən kino festivallarının birində mənə mükafat təqdim olunması üçün bu ölkəyə dəvət almışdım. Həmin ərəfədə Danimarkada Peyğəmbərimizi (s) təhqir edən karikaturlara yayımlanmışdı. Bir müsəlman incəsənət xadimi kimi bu hərəkətdən narahat oldum. Mən mükafatı təsis edən təşkilata məktubla müraciət edərək baş verən paradoksla bağlı izahat tələb etdim. Dedim ki, necə olur siz həm mənə mükafat verirsiniz, həm də ölkənizdə mənim mənsub olduğum dinin müqəddəs dəyərləri təhqir olunur. Bu səbəbdən verdiyiniz mükafatı qəbul etmirəm. Sonradan tək etirazla deyil bu məsələyə başqa aspektdən yanaşmaq barədə düşündüm. Çox fikirləşdim ki, nə etmək olar? Nəticədə İslamın sülh və birlik din olduğunu, Həzrət Peyğəmbərin (s) şəxsiyyətini tanıtmaq üçün film çəkməyi qərara aldım. Düşündüm ki, bir çoxları bəlkədə İslam Peyğəmbərini (s) yetərincə tanımır, onun necə mehriban, insanlığa sülh gətirən bir şəxsiyyət olduğunu, yaşam tərzini bilmir. Bəlkə bu vasitə ilə İslam və İslam Peyğəmbərini (s) qərbə tanıtmaq üçün bir qapı aça bilək. Bütün bunları ümumiləşdirərək “Məhəmməd Allahın elçisi” filmini ərsəyə gətirdim.”M. Məcidi vurğulayıb: “İndiyə kimi dünyada İsa (ə) barədə 200, Musa (ə) barədə 120, Budda barədə 70, Nuh (ə) kimi digər peyğəmbərlər barədə 42 film çəkilib. Amma aləmlərə rəhmət peyğəmbəri (s) barədə cəmi iki film çəkilmişdir. Onlardan birincisi 43 il bundan öncə çəkilmiş Məhəmməd (s) filmidir, ikincisi isə Məhəmməd (s) Allahın elçisi filmidir.”Məcidi qeyd edib ki, İslam Peyğəmbəri (ə) ilə bağlı çəkilmiş hər iki film İslam aləmində bəzi ölkələr tərəfindən problemlə üzləşib. Belə ki, bu filmin nümayişi Ərəbistanda qadağan olunub və filmin hazırlanmasından 3 il ötməsinə baxmayaraq hələ də bir çox müsəlman ölkələrində bu film ekrana çıxarılmayıb.
Dünya şöhrətli kinorejissor daha sonra deyib: “Filmin hazırlanması üçün çoxlu təlaşlar etdik. Peyğəmbərin (s) həyatından məzhəblər arasında ixtilaf olmayan məqamları seçdik və onun hazırlanmasında İslamın müxtəlif məzhəblərinin alimlərinin nəzərlərini öyrəndik.”Məcidi əlavə edib: “Bu filmin hazırlanması üçün böyük bir qəsəbə salınıb. Azərbaycan kino sənətkarlarını islami filmlər hazırlamaq üçün bu qəsəbədən istifadə etməyə dəvət etmişik.“Məhəmməd (s) Allahın elçisi” filmi İran dövlətinə aid deyil. Nə onun maliyyə dəstəyində, nə də digər işlərində dövlətdən kömək alınmayıb. Ümidvaram ki, bu film tezliklə Azərbaycan Respublikasında ümumi ekrana çıxsın və gənc nəsil həzrət Məhəmmədin (s) həyatı ilə daha çox tanış olsun.”M. Məcidi çıxışının sonunda İran və Azərbaycan mədəniyyət nazirlərinə minnətdarlıq edib və iki ölkə arasında mədəni və kino sahələrində münasibətlərin artmasını arzu edib.Xatırladaq ki, Azərbaycan Respublikasında İranın Mədəniyyət Günləri 27 iyundan 1 iyuladək Bakı və Gəncə şəhərlərində keçiriləcək.