İsrail rejiminin parlamentindəki (Knesset) ərəb deputatlardan Camal Zahalka İsrail rejiminin Əl-Əqsa məscidinin altında apardığı qazıntılara görə, məscidin güclü təkanlı zəlzələdə dağıla biləcəyi barədə xəbərdarlıq edib.
Arannews-Deyerler.org Anadolu-ya istinadən xəbər verir ki, Zahalka İsrail rejimində baş verən yüngül şiddətli iki zəlzələdən sonra verdiyi yazılı açıqlamasında, Əl-Əqsa məscidinin ətrafındakı qazıntılara diqqət yönəldib.
Əl-Əqsa məscidinin min ildən artıq müddətdir zəlzələlərə qarşı ayaqda qaldığını vurğulayan Zahalka, bununla yanaşı, İsrail rejiminin regionda apardığı qazıntıların təhlükə yaratdığını bildirib.
Fələstin rəhbərliyindən beynəlxalq qurumları bu məsələdə vəzifələrini yerinə yetirməsi üçün çağırış etməsini istəyən Zahalka, beynəlxalq mühəndislərdən ibarət bir komissiyanın Əl-Əqsa məscidinin altında görülən işləri təhlil etməli olduğunu qeyd edib.
Qeyd edək ki, ötən gün İsrail rejimində 4,5 və 4,1 bal gücündə iki zəlzələ qeydə alınmışdı.