Gürcüstanda İmam Rza (ə) mövludu keçirilib - FOTO

Arannews-İslamazeri.com xəbər verir ki, bu gün Marneulinin Ağaməmmədli kəndində İmam Rzanın (ə) təvəllüdü münasibəti ilə bayram mərasimi keçirilib. İmam Rza (ə) adına məscidin həyətində təşkil olunan mərasimdə din xadimləri, millət vəkili, rayon bələdiyyəsinin nümayəndələri, elm və ictimaiyyət xadimləri, rayon və ətraf kəndlərdən inanclı müsəlmanlar iştirak edib.

Məscidin axundu Kərbəlayi Çingizin aparıcılığı və giriş sözü ilə keçirilən mərasim Quran qiraətçisi Hacı Rza Cəfərinin Qurani-Kərimdən bir neçə ayəni tilavət etməsi ilə başlayıb. Mərasimdə Gürcüstan Müsəlmanları İdarəsinin şeyxi Hacı Ramin İgidov, Gürcüstan Ruhanilərindən Kərbəlayi Mahir Məmmədov, Gürcüstan Parlamentinin deputatı Ruslan Hacıyev, Marneuli rayon Bələdiyyə sədrinin müavini Mamuka Naveriani və digər şəxslər çıxış edərək əziz gün münasibəti ilə dünya müsəlmanlarını və məclis iştirakçılarını təbrik ediblər.Çıxış edənlər imamət səmasının 8-ci parlaq ulduzu İmam Rzanın (ə) həyatından və kəlamlarından örnəklər söyləyərək Əhli-beyt imamlarının bəşəriyyətə nümunə olduqlarını və müsəlmanların üzərində olan haqları haqqında danışıblar. Belə mərasimləri keçirməklə Hz. Peyğəmbər (s) və ailəsini yad etmənin və İmam Rza (ə) və digər imamların ziyarətlərində olmanın məqsəd, fəlsəfə və fəzilətlərindən söz açıblar. Şirniyyat süfrəsi ətrafında keçirilən mərasim “Nuri Taha” İlahi nəğmələr qrupunun (Səid Həsən və Rza Cəfərinin) oxuduğu şeir və ilahilərlə davam edib.