Bu cür tip rejimlərə zalımları ifşa edənlərin azadlığa çıxması sərf eləmir
Arannews-Tale Bağırzadə sonuncu dəfə həbsdən azadlığa çıxanda Azərbaycanın ümumi mənzərəsini vətəndaşa göstərmişdi. Demişdi ki, azadlığımda qəribə nəsə yoxdur. Mən balaca zindandan böyük zindana çıxmışam. Onu anlamayan bəzi vətənşüvənlər, əslində rejim yaltaqları isə "vətənpərvərlik dərsi" keçməyə başladılar. Güya Hacı Tale vətəni Azərbaycan haqqına bu cür danışmamalı idi. Əlbəttə bu fikirdə olan məmurlar, rejim yaltaqlarının özləri vətənin nə olduğunu bilmirlər. Uzaq başı "Vətəni sevmək imandandır" cümləsini əzbər bilirlər ki, bu söz də onlara aid deyil. Çünki məlumdur ki, bu adamlarda zərrə qədər iman yoxdur. Dinləri ata-baba dinidir (korkoranə təqlid), namaz yox, oruc yox, əvəzində bir anbar günahla yüklənmiş cəsədlərdir. Hacı Tale, Hacı Mövsüm, Hacı Abgül və digər inanclılar isə həm hərbi xidmətdə olublar, bəzisi ehtiyatda olan zabitdir, bəzisinin qardaşı hətta Qarabağ şəhididir. Amma vətənşüvənlərin isə balasını əsgər göndərmək olmur.
Hacı Tale isə demək istəyirdi ki, niyə bu vətəni zindana çevirmisiniz. Çünki həqiqətdə Azərbaycan haqsevər, vətənpərvər insanlar üçün zindan, yalaq, yaltaq, vicdanına ellərin tüpürdüyü insanlar üçün isə gəlir mənbəyi, pul dağarcığıdır.
Təbii ki, Hacı Tale xalqa əslində çıxış yolunu da göstərmişdi. Bildirmişdi ki, haqq demək yolunda qorxu olmamalıdır. Yuxarıda yazdığımız məşhur sözünün dalısınca demişdi ki, mən MTN-nin binasına sanki çayxanaya girirmiş kimi girib çıxdım. Ölümün gözünün içinə baxan, əcələ meydan oxuyan, zalımı dar ağacına çəkən bu insanı bu sözünə görə də qınamışdılar. Sanki o dövlət idarəsini təhqir etmişdi. Amma nəticə göz qabağındadır, Hacı Talenin çayxanaya bənzətdiyi MTN vaxt gəldi prezident tərəfindən ümumiyyətlə, yerli-dibli ləğv edildi. Deməli, Hacı Tale MTN haqda hələ yumşaq danışmışdı.
Sözü Hacının həbsi ilə başlamaqda məqsədim budur ki, hazırda azadlığa buraxdıqları İlqar Məmmədovun xaricə çıxışına qadağa qoyulub. Əli Kərimli kimi o da Azərbaycandan kənara çıxa bilməz. Digər tərəfdən başqa inanc, vicdan məhbusları kimi Hacı Tale isə həbsdədir. Zalımın at oynatdığı ölkələrdə bu cürdür. Adları çəkilən mərd insanlar həbsdə olanda zalımın içini yandırır, çölə çıxanda çölünü. Bu gün Avropada iqamət edən nə qədər soydaşlarımız var. İlham Əliyevi bütün günü təhqir edirlər. Təhqir etməyənlər də rejimin üzünü mədəni formada tüpürüb getmələri ilə öz etirazlarını bildiriblər. Rejim üçün isə heç də maraqlı deyil. İstəyirsən ölüb birdəfəlik get, istəmirsən get xaricdə yaşa. Əsas odur ki, ölkədən didərgin düş.
Bu cür tip rejimlərə zalımları ifşa edənlərin azadlığa çıxması sərf eləmir. Zalım rejimləri zalımı ifşa edənlərlə necə rəftar etməli olduqlarını bilmirlər. Bilmirlər pasportuna stop vurub ölkədə saxlasınlar, yaxud sürgün etsinlər, ya öldürsünlər. Çünki zalımı ifşa edən insanların ya sözünü qəbul etməlisən, ya da onu yerin dibinə gömməlisən, yəni öldürməlisən. Başqa çarə yoxdur. Amma zalımın həqiqətən zalım olduğunu sübuta yetirəcək dəlil bundan ibarətdir ki, bu ölkədə yaşayan da, həbsdə qalanda, ölkə hüdudları kənarına gedən də zalım rejimdən narazıdır. Rejim başını bu insanlar arasında itirib. Ölkədən çıxışına qadağa qoyduğu insanın əleyhinə bir cür plan qurmağa çalışır, həbs etdiyi və ya ölkə xaricində yaşayanlara başqa cür tələ qurmağa çalışır. Amma hər bir halda özünüifşadan savayı heç nə bacarmırlar. Bütün narazı kütləni isə başqa məsələlərdə bir-birindən ayrı salıb arada təfriqə yarada bilsələr də bir məsələdə onların vəhdətini qıra bilmirlər. O isə narazı kütlənin zalım əleyhinə bir əqidənin daşıyıcısı olmasıdır. Bu vəziyyəti isə zalım zülmünə davam etməklə uzunömürlü edir.