Zilhiccə ayının onuncu günü və Qurban bayramı öz ilahi təfəkkür nuru ilə Məşuqu tərəfindən çox böyük və çətin imtahan qarşısında dayanan bir peyğəmbərin vücudunda iman və eşqin ən ali səviyyəsinin təcəllisinin xatırlandığı gündür.
Arannews-Bu gün, sevinc və şadlıq günüdür. Çünki xalis bir bəndənin çətin imtahandan başıuca çıxmasından və öz bəndəliyini Uca Tanrının dərgahında sübut etməsindən əlavə, Allah bəndələrindən böyük bir qrupu Allah evini ziyarət etməyə tələsir, Mina və qurbanlıq əməlini yerinə yetirir.Həqiqətdə Qurban bayramı insanın nəfsini saflaşdırması, dünyəvi-nəfsi istəklərlə mübarizə bayramıdır. Bu cahanda insanın mənəvi təkamülü üçün lazım olan işlərdən biri də nəfsi saflaşdırmaq, əxlaqi göstərişlərə əməl etmək və Allaha tərəf seyrü-süluk etməkdir. Allahın göstərişlərinə diqqət etdikdə görürük ki, insan qarnını doldurmaq, istəklərini yerinə yetirmək və yatmaq üçün yaradılmamışdır. İnsan uca bir məqsəd və nəticə üçün yaradılıb. Bu məqsəd varlıq bəxş edən sonsuz başlanğıca yetişməkdir.Elə buna görə də insani irfanda üç merac nəzərdə tutulmuşdur. Onlardan biri də təhlil meracıdır. Buna merac deyilməsinin səbəbi onun Allaha tərəf seyrü-süluk və Allaha tərəf yüksəliş olmasıdır. Deməli, insan öz həyatında kamalda qalması üçün mənəvi riyazətlərə ehtiyacı vardır. Şəri riyazətlər və seyrü-süluk nəfs üçün riyazət hesab olunur.Bu mübarizə və təhlil meracının cilvəsini Qurban günü həzrət İbrahimin (ə) nəfslə mübarizəsində görmək olar. Bu əzəmətli bayram həzrət İbrahim (ə) və İsmayıldan (ə) örnək götürmə və Mütəal Allaha yaxınlaşma üçün çox uyğun bir nişanədir. Allahın iki peyğəmbəri – İbrahim və İsmayıl nəfsin qurban və fəda edilməsi cilvəsini hamıya göstərir. Ona görə də Qurban bayramı günləri fürsəti qənimət sayaraq həmin əzəmətli hadisənin ildönümü münasibətilə öz nəfsimizi qurban etməyə təlaş göstərməliyik.
Həzrət İbrahim və İsmayılın ibrətli qurbanlıq hekayəsindən və Qurban bayramından dərs almaqla insan hər hansı gün çoxlu sayda istəkləri və ilahi vəzifələri arasında, yəni haqla batil arasında, haqqı seçərsə, hətta iki haqq arasında ən haqlısını və ən üstününü seçə bilərsə, həmin gün onun üçün bayramdır.İbrahim peyğəmbərin əsasını qoyduğu Qurban bayramında İbrahim istək, yəni uzun illər yalvarışdan sonra Allahdan hədiyyə aldığı və sevgi bəslədiyi övladı ilə Allahın ona övladını qurbanlıq etmək barədə verdiyi göstəriş arasında Allahın əmrini seçdi. Ona görə də bu gün bayramdır. Eləcə də günah etmədiyimiz, öz vəzifəmizi istəyimizdən üstün tutduğumuz gün bayramdır.