Arannews-Jalə Mütəllimova adlı "Müsavat" yazarı "Anayla siyasət olmaz atam balası" başlıqlı yazısında Mehman Hüseynova dərs keçməyə qalxışıb. Gülməli kinoda dediyi kimi "əvvəli gülməli, axırı ağlamalı" cinsindən olan yazıdır. Yazısında konkret olaraq Mehmanın kimlərsə tərəfindən qəhrəman elan edildiyini deməyə çalışan müəllifin nəhayət ürək sözünü bir cümlə ilə belə ifadə etmək olar: ağlını başına yığıb evində oturub anana baxardın.Əslində bu yazıya cavab yazı yazmaq fikrimiz yox idi. Amma sırf bu cümlələr yazmağa vadar etdi. Xanım firkini belə əsaslandırır ki, Mehmanın qoltuğuna qarpız verənlər onun bu günə qalmasına səbəb oldu.
Təbii ki, yazı "Müsavat" qəzetinin yazarına aid olduğu üçün Mehmanı "nə günlərə qaldın a Mehman", yaxud " nə gündəsən Niyaməddin" kimi təqdim etməyə çalışıb. Amma anlamayıb ki, Mehman bu dəqiqə Avropadan tutmuş, Asiyaya, hətta Afrikaya qədər zülmlə mübarizə aparan insanların qəhrəmanlarından birinə çevrilib. Ən əsas da xalq arasında zülmlə mübarizə apardığı üçün sevilir. Siz zülmə boyun əymisiniz deyə başınızı qaldırıb ətrafa baxmırsınz. Üslubu necədir, necə olmalı idi, hansı tənqidlər, təkliflər vermək olar – bütün bunlarla işimiz yoxdur, əsas odur ki, zalımların yuxusuna haram qatıb Mehman Hüseynov.
Müəllif xanım Mehmanın anasının bir ay bundan qabaq sapa-sağlam olduğunu, daha sonra dünyasını dəyişdiyini müqayisə etməsini anasının zalım qüvvələr tərəfindən öldürülməsinə eyham vurduğunu yazmağa çalışır. Yazının da adını bilərəkdən belə qoyub. Xanım altdan altdan deməyə çalışır ki, nahaq yerə ananın ölümünü hakimiyyətin üstünə atırsan, özün ananın qeydinə qalmalı, işləyib onu müalicə etdirməliydin. Ona görə də yazının adını "anayla siyasət olmaz" qoyub. İnanmıram ki, bu xanım Avropa ölkələrindən olan müxalifətçilərin ana-bacılarının polis bölmələrində onlardan imtina etmələri mövzusunda təzyiqlərə məruz qaldıqlarını bilmir. Çox gözəl bilir. Deməli ana-bacı ilə siyasət aparan Rauf Arifoğlunun gündə yaltaqlandığı hakimiyyətdir. Bu öz yerində. Lap gülməlisi bilirsinizmi nədir? Hörmətli yazar xanım güya Mehmana dərs verməyə çalışır ki, ananı siyasətə qatma, bir ana siyasətə qarışmaz. Amma 1-ci vitse prezident bir qadın, bir ana seçiləndə bu yazını yazmamışdı. Halbuki gözəl bilir ki, bu gün vitse prezident sabah (böyük ehtimalla) prezidentdir. Özü də ana prezident, çünki arxasınca balası gəlir. (Əlbəttə zalım saydığını saysın, Allahın öz hesabı var) Üstə gəl, müəllifin özü də anadır (həmin məqaləsində bu barədə yazıb) və özü də istəyərək siyasətə qarışıb. İndi bu cür adamların nəzərində müxalifətçini boykot edib prezidentin dəyirmanına su tökmək dövlətçiliyə xidmət sayılır. Amma açıq-aşkar özləri yazılarında hakimiyyəti haqlı çıxarmaqla hakimiyyətə işlədiklərini məlum edirlər. Özü də xanım olduqları halda. Sonra da durub deyirlər ki, ana siyasətə qarışmamlıdır. Halbuki özləri bir başa İlham Əliyevin siyasətinə xidmət edirlər və bundan da qürur hissi keçirirlər. (Arifoğlunun televizorda prezidentdən medal aldığını ağzı sulana-sualana danışması buna bariz arqumentdir)
Bir də hörmətli müəllif şükür edir ki, Mehman onların siması deyil. Düzdür, Mehman Rauf Arifoğlu siması deyil.
Sonda xanım yazar Heydər Əliyev siyasətinə müraciət etməklə arifoğlusayağı jest etməyə çalışır. Onun barədə olan xatirəsi uzundur. Amma bu cümləni yazmadan keçə bilmərəm: "Ölkənin güclü, seçilən müxalifəti olmalıdır ki, hökümət üzvləri özlərində görmədikləri mənfi keyfiyyətləri, qüsurları, nöqsanları onlardan eşitsin, öz üzərilərində işləsinlər." Axırda da deyir ki, indi bu pozulub, daha doğrusu yoxdur. Elə Mehman da bunu eləmək istəyirdi də, daha durub niyə düşmən dəyirmanına su tökürsünüz.
Nə isə, bu xanımın məlum yazısını vecimizə almaya bilərdik. Amma özü də bir anadır, gələcəkdə uşaqlarının ona "anacan, əziz ana, canım-gözüm anam, siyasət sənlik deyil axı, anayla siyasət olmaz axı" deməzdən qabaq biz ona xatırlatmaq istədik.