Tarix : 2018 Nov 05
Kod 56844

Gəncədəki Aşura hadisələrinə görə məhkəmə hökm oxudu

Dünən Gəncə şəhər Kəpəz rayon Məhkəməsində hakim Yaşar Həşimovun sədrliyi ilə keçən il Gəncədə İmamzadə ziyarətgahında keçirilən Aşura mərasimi zamanı polis əmakdaşları ilə ziyarətçilər arasında baş vermiş insidentlə bağlı təqsirləndirilən dini fəal Firudin Zeynalovun məhkəmə iclası keçirilib.

Arannews-Bu barədə Rakurs.tv-yə Firudin Zeynalovun yaxınları məlumat veriblər.Məlumatda qeyd olunub ki, iclasda Firudin Zeynalov son söz ilə çıxış edib: “Mən hələ 2000-ci ildə universitetin 2- ci kursunda təhsil alarkən YAP-a üzv olmadığım və bu hakimiyyətə nifrətimi aşkar bildirdiyim üçün, eləcə də həmin illərdən üzv olmasam da bir çox müxalif partiyaların gənclər təşkilatlarının tədbirlərində və hökumətin əleyhinə olan bir çox mitinqlərdə iştirak etdiyim üçün hədəfə alınmışdım. Son illər isə istər Müsəlman Birliyi Hərəkatı, istərsə də müxalif düşərgənin aksiya və tədbirlərində iştirakıma görə dəfələrlə təhdid olunmuşdum. Həbs olunduqda polis rəisi mənə açıq-aşkar məni həbs etmək üçün bəhanə yarandığını, mənim əslində baş vermiş qarşıdurmaya görə yox, müxalif düşərgənin aksiyasından çəkilmiş bir şəkilə və MBH-yə açıq dəstək verdiyimə görə həbs edildiyimi bildirdi. Həbsdə olduğum müddətdə isə həbsxanadan yazdığım Cümhuriyyət təbriki bu qəzəblərini daha da artırdığından mənə qarşı daha qərəzli mövqe nümayiş etdirəcəklərini və yeni ittihamlar verəcəklərini dilə gətirdilər. 28 Mayda yazdığım məqalədən təxminən 1 ay sonra 3 iyulda Yunis Səfərovun Elmar Vəliyevə məlum hücumu ilə bağlı mənə 8 ağır maddə ilə cinayət işi başlandı. Bu günə qədər də haqqımda verilmiş ittiham qərarında nəinki sübutlar, hətta cinayətdə hansı əməlimin olmasına dair şübhələr belə göstərilməyib. Mənə elə gəlir ki, bütün bunların səbəbləri hər kəsə gün kimi aydındır. Əminəm ki, nə vaxtsa haqq-ədalət bərqərar olacaq və haqsevər mübariz insanların əziyyətləri sayəsində bütün günahsız insanlar öz haqlarına qovuşacaqlar. Bilin ki, bir məhkəmə də Qiyamət günü olacaq. Siz orda hakim kimi yox, təqsirləndirilən şəxs olaraq yol verdiyiniz haqsızlıqların cəzasını mütləq alacaqsınız. Amma bu o demək deyil ki, biz haqsızlıqlarla mübarizəmizi dayandırıb Qiyamət gününü gözləyəcəyik. Biz sizinlə artıq elə rəftarlar edəcəyik ki, arxalandığınız məmurlar da sizi müdafiə etməkdə aciz olacaqlar. Mən sözümü dedim, indi seçim sizindir".Son sözdən sonra hakim Firudin Zeynalova hökm oxuyub.Hakimin hökmünə əsasən Firudin Zeynalov 3 il, digər 6 şəxs isə 1 il 4 ay müddətinə azadlıqdan məhrum ediliblər.

  • Yazılıb
  • da (də) 2018 Nov 05
  • Göndərən مدير سايت Aran News