Türkiyədə saxlanaraq Azərbaycana təhvil verildiyi bildirilən «Müsəlman Birliyi» Hərəkatının üzvü Anar Cabbarova qarşı narkotik ittihamı irəli sürülüb
Arannews-Bu barədə inanclı fəalın anası Hökumə Cabbarova məlumat verib.«15 gündür axtara-axtara qalmışdıq. Dəfələrlə Kürdəxanı təcridxanasına da getmişdik. Aprelin 4-də səhər saatlarında bizə xəbər verildi ki, artıq təcridxanaya köçürüblər. Gəlib təcridxanadan dəqiqləşdirdik, dedilər ki, burdadır, narkotiklə rəsmiləşdiriblər», - H.Cabbarova bildirib. A.Cabbarova qarşı CM-in 234.4.3 (satış məqsədilə külli miqdarda narkotik əldə etmə, daşıma, saxlama) maddəsi ilə ittiham irəli sürülüb. Bu maddədə 5 ildən 12 ilə qədər həbs cəzası nəzərdə tutulub. A.Cabbarov «Müsəlman Birliyi» Hərəkatının sədri, həbsdə olan ilahiyyatçı Taleh Bağırovun ailəvi dostudur. Ailəsi hesab edir ki, onu məhz bu səbəbdən cəzalandırırlar. «Müsəlman Birliyi» Hərəkatının sədri T.Bağırov da daxil, təşkilatın onlarla üzvü həbsdədir. Onların əksəriyyəti 2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyat zamanı və ondan sonrakı günlərdə həbs olunub. Həmin vaxt Nardaranda və bundan bir qədər əvvəl Sabunçu Rayon Polis İdarəsinin qarşısında baş verən hadisələrə görə 70-dən çox (hüquq müdafiəçilərinin siyahısında bu rəqəm 80-dən çox göstərilir) adam həbs olunub.İlahiyyatçı T.Bağırov 20 il həbs cəzasına məhkum edilib.Nardaran olayları ilə bağlı həbs edilənlərin əksəriyyəti məhkəmələrində tutularkən və ilkin dindirilmədə ağır işgəncələrə məruz qaldıqlarını bildiriblər.