Təklif əksər sosial şəbəkə iştirakçılarının diqqətini cəlb edib.
"Arannews-Toplum TV” cəmiyyətin müxtəlif təbəqlərinin təmsilçilərinə müraciət edərək, "Qızıl Amnistiya” təklifinə münasibət öyrənib.
Deputat Azay Quliyev bütöblükdə təklifi müsbət qiymətləndirdiyini bildirib: "Bu gün biz tarixi günlər yaşayırıq. Azərbaycan yeni qalibiyyət səhifəsini yazır. İnsanlarda böyük ruh yüksəkliyi var. Müxtəlif təkliflər səslənir, bu təkliflərdən biri də bu böyük qələbə münasibətilə böyük bir amnistiya aktının imzalanmasıdır. Mənim tövsiyəm odur ki, bütün bu təkliflər toplanaraq Ali Baş Komandana təqdim edilsin. Prezident bununla bağlı yəqin ki ən doğru qərarı verər”.
A.Quliyev bu gün bütün diqqətin Qarabağa yönəlməli olduğunu deyib: "Hələ bütün diqqət Qarabağdakı əməliyyatların sona çatdırılmasına yönəlməlidir. Bizim bugünkü amalımız bütün torpaqlarımızı son qarışınadək azad etməkdir. Gündəmdə başqa məsələ olmamalıdır”.
Deputat ölkədəki siyasi məhbusların da amnistiya aktına salınması təkliflərini belə şərh edib: "Zamanı gələndə bu məsələ ilə bağlı ən doğru qərarı prezident verəcək. Mən istəmirəm ki, onun səlahiyyətinə aid olan məsələrlə bağlı indidən nə isə şərh verək. Amma bu günkü həmrəylik demək olar ki, cəmiyyətin bütün təbəqələrinin istəklərini həyata keçirmək üçün əsas yaradır. Düşünürəm ki, bu müzakirəni açanlar xoş niyyətlə ediblər. Amma gəlin kimisə fakt qarşısında qoymayaq, bu məsələni gündəmə gətirməklə dolayısı ilə təzyiq elementi yaratmayaq”.
Deputat Aydın Mirzəzadə təklifi müsbət qarşılasa da, Azərbaycanın işğalda olan ərazilərinin tam azad olunmasından sonra reallaşa biləcəyini deyib: "Azərbaycan tarixində çox əhəmiyyətli hadisə baş verib və sevinc içərisində olan adamların müxtəlif bu kimi təkliflər səsləndirməsi anlaşılandır. Hələ əməliyyatlar davam edir, torpaqlarımız işğaldan tam azad olunandan sonra bu məsələyə baxıla bilər. Ondan sonra sosial əhəmiyyətli geniş layihələr həyata keçiriləcək və həyatımız daha yüksək inkişafla davam edəcək”.
O, siyasi məhbusların da bu amnistiyaya salınması barədə fikirləri belə şərh edib. "Azərbaycanda siyasi məhbus yoxdur. Adətən, amnistiya aktlarında cəmiyyət üçün təhlükəli olmayan insanlar azadlığa buraxılırlar. Düşünürəm ki, bu yanaşma davam etdiriləcək”.
Hüquq müdafiəçisi Anar Məmmədli isə "Qızıl Amnistiya”nın nəticə etibarilə Azərbaycanın xeyrinə işləyəcəyini deyib: "Bu, bir tərəfdən ölkədə insan resursunu artırmaq, digər tərəfdən vətəndaş həmrəyliyini gücləndirmək üçün müsbət addım ola bilər. Üçüncüsü də bu amnistiya aktından siyasi məhbuslara da pay düşə bilər. Bu isə öz növbəsində ölkədə milli bilrliyin təmin olunması, fərqli siyasi baxışlar arasında gərginliyin aradan qalxması, etimad mühitinin yaranmasına yardım edə bilər”.
A.Məmmədli müharibə başlayandan sonra Ermənistanda belə bir amnistiya aktının qəbul olunduğunu xatırladıb: "Düzdür, onların məqsədi daha çox o adamları səfərbərliyə cəlb etmək idi. Azərbaycanın isə belə bir problemi yoxdur. Lakinn ciddi bir annistiya aktı qəbul olunarsa və oraya siyasi məhbuslar salınsa, bu Azərbaycana Avropa Şurasının və müxtəlif beynəlxalq qurumlarının tənqidlərini də azalda bilər”.
Hüquq müdafiəçisi Rəsul Cəfərov da belə bir amnistiya aktının cəmiyyətə fayda verəcəyini bildirir: "Aydın məsələdir ki, burda xüsusilə ağır cinayətlər və ya təkrar cinayət törətmiş adamar yararlana bilməz. Bu, cəzalarının böyük hissəsini cəkmiş və yüngül cinayət törətmiş adamlara aid edilə bilər. Ölkədaxili həmrəyliyin gücləndirilməsi üçün bu, əhəmiyyətli addım olar”.
R.Cəfərli region ölkələrində də belə amnistiyaların qəbul olunduğunu xatırladıb: "Təcrübə göstərir ki, bu, heç də cinayətkarlığın artmasına səbəb olmayıb. Əksinə həmin adamların həyata daha müsbət notlarla davam etməsinə təkan verib”.
Hüquq müdafiəçisi Azərbaycanda sübuta yetirilməyən ittihamlar nəticəsində həbsdə olan şəxslərin də budəfəki amnistiyaya salına biləcəyini vurğulayır: "Məsələn, 1996-cı ildən həbsdə olan OMON-çuları, başqa siyasi məhbusları nəzərdə tuturam. Onların da adları bu akta salına bilər”.