Azərbaycan Əsgəri Ali Baş Komandanın rəhbərliyi altında Qarabağda zəfər tarixi yazır.
Arannews-Bu günlər bütün dualarımız Vətən müharibəsində bizə Qələbə sevinci yaşadan əsgərlərimizlə bağlıdır.
saytı “Əsgərə məktub” rubrikasında növbəti məktubu təqdim edir.
Bu dəfə Azərbaycanın Milli Qəhrəmanı, Qarabağda bayraq sancmaq arzusu ilə şəhidlik zirvəsinə yüksələn, Tovuz döyüşlərində canını Vətənə qurban verən, Azərbaycanın igid, yenilməz, məğrur oğlu, general-mayor Polad Həşimovun anası Səmayə Həşimova “Əsgərə məktub” yazıb:
“Əziz Əsgər balalarım, oğlumun bir arzusu, amalı var idi, əzəli Azərbaycan torpağı olan Qarabağa Üçrəngli bayrağımızı sancmaq…
Bu, Polada qismət olmasa da, sən, İgid Əsgər, onun qanını yerdə qoymayıb, bunu bacardın. İllərdir düşmən tapdağında olan torpaqları azad etdin. Polad sizi çox sevirdi. Polad Vətənimizi çox sevirdi.
Qəhrəman Əsgərlərim, sizə təşəkkür edirəm. Oğlumun və onun timsalında neçə-neçə igidlərin qanını yerdə qoymadınız. Sizinlə fəxr edirəm, siz bütün Azərbaycanın qürur mənbəyisiniz.
Torpaqlarımızın alınmasında öz şücaətini göstərən bütün əsgərlərin qarşısında baş əyirəm. Sizinlə səngərdə çiyin-çiyinə vuruşanların arasında şəhid olanlara Allahın rəhmətini diləyirəm. Yaralananlarınıza tez bir zamanda məğrur, yenilməz, qalib əsgər kimi azad olunmuş torpaqlarda gəzməyi arzulayıram. Arzu edirəm ki, ailənizin, övladlarınızın yanına tezliklə qayıdasınız. Allah sizlərin üzərində daim yar olsun.
Azərbaycanın Müzəffər Ordusuna və Ali Baş Komandanımıza minnətdarlığımı bildirirəm. Oğlumun adının əbədiləşdirilməsi üçün mümkün bütün addımları atdı.
Azərbaycan oğulları qürurlu, məğrur, qəhrəmandır”.