Azərbaycan Respublikasında müxtəlif vaxtlarda həlak olan hərbçilərin valideynləri bu gün Prezident Administrasiyasının qarşısında aksiya keçiriblər. Onlar həlak olanlara "şəhid" statusunun verilməsini tələb edirdilər.
Arannews :Valideynlər bildiriblər ki, bütün instansiyalara müraciət ediblər, amma nəticəsiz qalıb. Etirazçıları Prezident Administrasiyasına söhbətə dəvət ediblər.
"Deyirlər ki, özü- özünü vurub. Ona görə şəhidlik statusu verilmir. Mənim oğlum 1 il, 6 ay Murovdağda xidmət edib, 44 günlük müharibədə iştirak edib, medalla təltif olunub. Tərxisə 6 gün qalmış dedilər ki, özü- özünü vurub", -aksiya iştirakçılarından biri deyib.
Aksiyanın işıqlandırılması zamanı Fatimə Movlamlı və Sevinc Sadiqovun saxlanılaraq polisə aparıldığı bildirilir.
Reportyor Fatimə Mövlamlı bu gün Bakının Səbayel rayon 9-cu polis bölməsində döyüldüyünü bildirir.
"Bizi Prezident Administrasiyasının qarşısında saxladılar. Mobil telefonları almaq istədilər və çəkilişi silməyi tələb etdilər. 9-cu bölmədə çavuşlar rəhbərliyin gözləri qarşısında məni iki dəfə döşəməyə yıxaraq vurmağa başladılar. Ayağımda ayaqqabının izləri qaldı. Onlar mənim gödəkcəmi cırdılar", - o deyib.
Daxili İşlər Nazirliyində Mövlamlının bəyanatını "əsassız" adlandırıblar.
Xatırladaq ki, Fatimə Mövlanlı frilanserdir, müxtəlif sayt və KİV ilə əməkdaşlıq edir.