Rusiyanın Vyanada yerləşən beynəlxalq təşkilatlardakı səfiri və daimi nümayəndəsi ABŞ prezidentinin İranla bağlı ritorikasını pisləyib və deyib: İranla razılaşmanın yeganə real yolu təhdid və ya gücdən istifadə deyil, diplomatiyadır.
arannews:parstoday-Mixail Ulyanov şənbə günü İRNA-nın müxbiri ilə müsahibədə deyib: "Biz ABŞ-ın İrana qarşı hər hansı güc tətbiqi təhdidinin qəti əleyhinəyik; O ki qaldı nüvə obyektlərinə hərbi hücum təhlükəsinə. Biz bu cür siyasəti pisləyirik. Rusiya həmişə hesab edib ki, İranın nüvə proqramı ilə bağlı məsələlərin yeganə həlli diplomatik yoldur." O, Vaşinqtonun siyasətindəki ziddiyyətə toxunaraq deyib: Biz indi bir paradoksla üzləşirik. Birgə Hərtərəfli Fəaliyyət Planı 2015-2018-ci illər arasında lazımi şəkildə yerinə yetirilən çoxtərəfli saziş idi və onun məqsədi İranın nüvə proqramı ilə bağlı bütün sualları siyasi və diplomatik yollarla həll etmək idi. Lakin 2018-ci ildə Donald Trampın ilk səlahiyyət müddətində birtərəfli qaydada bu müqavilədən çıxdı və İrana qarşı maksimum təzyiq siyasətini tətbiq etdi.
Vyanadakı yüksək rütbəli rus diplomatı qeyd edib: "İndi, yeddi ildən sonra biz bu siyasətin tamamilə iflasa uğradığını açıq şəkildə görürük. Birləşmiş Ştatlar qarşıya qoyduğu məqsədlərin heç birinə nail olmadı; daha doğrusu, tamamilə əks nəticə əldə edildi. İran öz nüvə imkanlarını daha da inkişaf etdirdi və bu, Qərb ölkələrinin narahatlığına səbəb oldu. Baxmayaraq ki, BHFP-nın əsas məqsədi həmişəlik bu narahatlıqları aradan qaldırmaq idi.
O, "İranın sülhməramlı nüvə proqramının Beynəlxalq Atom Enerjisi Agentliyinin daimi nəzarəti altında olduğunu" bildirib və əlavə edib: İrandakı monitorinq tədbirləri digər qeyri-nüvə ölkələrinin monitorinq səviyyəsindən daha sərtdir.
Rusiya səfiri qeyd edib: İranın nüvə silahı yaratmağa çalışdığına və ya bu istiqamətdə fəaliyyət göstərməsinə dair heç bir əlamət yoxdur ki, bu yaxınlarda Amerika kəşfiyyatı da daxil olmaqla, dəfələrlə təsdiqlənib.
Ulyanov İranın nüvə proqramı ilə bağlı məsələlərlə bağlı “peşəkar, hədə-qorxu və təxribat xarakterli şantaj olmadan” dərhal dialoq və danışıqlar yoluna qayıtmağı zəruri hesab edib və bildirib: “Bu, irəliyə doğru yeganə real və potensial məhsuldar yoldur”.