Qəsəbə sakinləri bildiriblər ki, əgər məsələ onların xeyrinə həll edilməsə, onlar etiraz aksiyası keçirəcəklər
Azərbaycan servisi/Aran Agentliyi
Nardaran qəsəbəsinin bir qrup sakini ABŞ-ın Azərbaycandakı keçmiş səfiri Stenli Eskuderonu onların torpaqlarını ələ keçirməkdə ittiham edirlər. Reportyorların Azadlığı və Təhlükəsizliyi İnstitutunda keçirilən mətbuat konfransında qəsəbə sakinləri bildiriblər ki, keçmiş səfir "qədimdən nardaranlılara məxsus olan" 30 ha sahəyə iddia edir.
Nardaranlılar həmçinin bildiriblər ki, bu torpaqların Cəbrail Salmanov adlı birinə məxsus olması haqda məhkəmə qərarı var, onun qızı Nigar isə Eskuderonun gəlinidir.
Lakin qəsəbə sakinləri iddia edir ki, bu torpaqlar heç vaxt Salmanova məxsus olmayıb. İndi işə Ali Məhkəmənin Plenumunda baxılır.
Qəsəbə sakinlərinin vəkili Raqif Mustafayev əvvəlki məhkəmə qərarlarını tamamilə əsassız və qanunazidd sayır.
Qəsəbə sakinləri bildiriblər ki, əgər məsələ onların xeyrinə həll edilməsə, onlar etiraz aksiyası keçirəcəklər. Eyni zamanda, onlar Stenli Eskudero ilə müqaviləyə də getməyə hazır olduqlarını bildiriblər və qeyd ediblər ki, sonuncu bir dəfə də olsa onlara müraciət etməyib, pul isə heç təklif etməyib. Onlar həmçinin bildiriblər ki, ABŞ-ın Bakıdakı səfirliyinə də müraciət ediblər, amma indiyədək cavab almayıblar. Qəsəbə sakinləri məsələnin onların xeyrinə həll edilməyəcəyi təqdirdə prezident seçkilərinə etinasızlıq göstərəcəklərini ilə hədələyiblər.
Qeyd edək ki, söhbət Nardaran və Bilgə qəsəbələri arasındakı çimərlik sahəsindən gedir. Bu yerə iddia edən şəxslərin heç bir sənədi yoxdur. Həmçinin, qeyd etmək lazımdır ki, qanunla dəniz çimərlikləri özəlləşdirilə bilməz, lakin son illər bu vəziyyət müntəzəm olaraq pozulub və ilk növbədə dövlət məmurları tərəfindən pozulub.
Stenli Eskudero 1997-2000-ci illərdə ABŞ-ın Azərbaycadakı səfiri olub. Ona qədər o, Tacikistan və Özbəkistanda səfir olub.
Diplomatik xidmətdən getdikdən sonra Eskudero Azərbaycanda Shield Bearer L.L.C. adlı konsaltinq xidmətinə rəhbərlik edib. Eyni zamanda, Eskudero Amerika-Azərbaycan ticarət palatasının vitse-prezidentidir. Bir çox müxalif KİV-lərin iddiasına görə, Eskudero Azərbaycan məmurlarının bir çox hökumət məmurlarının biznes-partnyorudur və Vaşinqtonda rəsmi Bakının maraqlarını himayə edir.